BMW fólksbifreið ekið Eyjafjarðarbraut eystri til norðurs. Um 1.150 metrum norðan við gatnamót Miðbrautar og Eyjafjarðarbrautar eystri fór bifreiðin út af veginum hægra megin, eftir að ökumaður missti stjórn á henni. Ökumaður og farþegi létust í slysinu. Í skýrslunni kemur fram að um ofsaakstur var að ræða.
Sherco bifhjóli var ekið suðaustur Heiðmerkurveg. Um 2,3 km frá gatnamótum við Elliðavatnsveg missti ökumaður stjórn á bifhjólinu svo það fór út fyrir veg, yfir á kjarr- og móavaxið hraun vestan megin vegarins. Hann kastaðist af hjólinu og lést af völdum fjöláverka. Ökumaður var ekki með ökuréttindi fyrir bifhjól. Skráningarnúmer bifhjólsins var innlagt hjá skoðunarstofu.
Nissan fólksbifreið var ekið suðvestur Reykjanesbraut við Straumsvík í Hafnarfirði. Á sama tíma var Volvo vörubifreið með festivagn ekið úr gagnstæðri átt. Í framhaldi lenti fólksbifreiðin framan á vinstra framhorni vörubifreiðarinnar. Ökumaður fólksbifreiðarinnar slasaðist alvarlega í árekstrinum og lést átta dögum síðar. Ökumaður vörubifreiðarinnar slasaðist ekki.
Massey Ferguson dráttarvél var ekið vestur Suðurlandsveg við afleggjara að Eystri-Sólheimum. Á sama tíma var Jeep Wrangler fólksbifreið ekið úr sömu átt og aftan á dráttarvélina. Ökumaður dráttarvélarinnar lést á slysstað.
BMW fólksbifreið var ekið suður Vesturlandsveg við Hvalfjarðarveg. Á sama tíma var tveimur vörubifreiðum ekið úr gagnstæðri átt. BMW bifreiðinni var ekið yfir á vinstri vegarhelming akbrautarinnar utan í hlið fremri vörubifreiðarinnar og eftirvagns. Í framhaldi lenti fólksbifreiðin framan á vinstra framhorni aftari vörubifreiðarinnar. Ökumaður fólksbifreiðarinnar lést á slysstað og slasaðist farþegi fólksbifreiðarinnar alvarlega.
Dacia fólksbifreið ekið norðaustur Suðurlandsveg við Skaftafell. Á sama tíma var Audi fólksbifreið ekið úr gagnstæðri átt suðvestur Suðurlandsveg. Um 180 metrum suðvestan við gatnamótin að Skaftafellsvegi fór Audi bifreiðin yfir á rangan vegarhelming og framan á Dacia bifreiðina í hörðum árekstri. Tveir farþegar í Dacia bifreiðinni létust í slysinu.
Toyota Hilux bifreið var ekið suður Grindavíkurveg. Á sama tíma var Mercedes Arocs vörubifreið ekið úr gagnstæðri átt norður Grindavíkurveg. Ökumaður vörubifreiðarinnar missti stjórn á bifreiðinni í mjúkri vinstri beygju og rann hún yfir á gagnstæðan vegarhelming og út fyrir veginn. Ökumaður Toyota bifreiðarinnar beygði til hægri og rákust bifreiðarnar saman utan akbrautarinnar. Ökumaður og farþegi í Toyota bifreiðinni létust í slysinu.
Toyota Yaris fólksbifreið var ekið suðaustur Vesturlandsveg við Skipanes. Á sama tíma var Volvo S40 fólksbifreið ekið úr gagnstæðri átt norðvestur Vesturlandsveg. Toyota bifreiðinni var ekið yfir á rangan vegarhelming og framan á Volvo bifreiðina í hörðum árekstri. Ökumaður Toyota bifreiðarinnar lést í slysinu.
Bifreið sem var ekið Reykjanesbraut til vesturs á hægri akrein við Innri-Njarðvík var sveigt yfir á vinstri akrein, inn á miðdeili á milli akbrauta Reykjanesbrautar, á víravegrið sem hún kastaðist af og valt í framhaldi af því. Ökumaður var einn í bifreiðinni og lést hann í slysinu.
Vegfarandi var á reiðhjóli á göngustíg við Ásvelli og beygði til vesturs innkeyrslu að bifreiðastæði sunnan við Ásvallalaug. Á sama tíma var vörubifreið ekið inn á innkeyrsluna að bifreiðastæðinu og á vegfarandann, sem lést samstundis.
Sendibifreið var ekið frá Vonarstræti inn á Lækjargötu í veg fyrir skotbómuvinnuvél með þeim afleiðingum að lyftaragafflar gengu inn í farþegarými sendibifreiðarinnar. Ökumaður hennar lést í slysinu.
Fiat Weinsberg fólksbifreið var ekið suðaustur Snæfellsnesveg skammt norðan við Hítará. Á sama tíma var Nissan X-Trail fólksbifreið ekið úr gagnstæðri átt norðvestur Snæfellsnesveg. Nissan bifreiðinni var ekið yfir á rangan vegarhelming og framan á Fiat bifreiðina í hörðum árekstri. Farþegi í aftursæti Fiat bifreiðarinnar lést í slysinu.
Bifreið, sem ekið var í norðausturátt á Þrengslavegi, fór út fyrir veg hægra megin í mjúkri vinstri beygju og var ekið í vegfláa nokkra stund áður en hún endastakkst nokkrum sinnum. Ökumaður var einn í bifreiðinni og lést hann í slysinu.
Bifhjóli var ekið Laugarvatnsveg til norðurs. Skammt frá gatnamótum Laugarvatnsvegar og Biskupstungnabrautar missti ökumaðurinn stjórn á bifhjólinu með þeim afleiðingum að það fór út fyrir veg þar sem hjólið endastakkst. Ökumaður bifhjólsins lést á slysstað af völdum fjöláverka.
Peugeot fólksbifreið ekið inn á Nausthamarsbryggju í Vestmannaeyjum og stöðvuð þar við bryggjukantinn. Þar var bifreiðin kyrrstæð í tæpar 50 sekúndur. Þá var henni ekið af stað, yfir bryggjukantinn og hafnaði hún í sjónum. Ökumaðurinn var einn í bifreiðinni og lést hann í slysinu.
Sprenging varð í þrýstigeymi tvíorkubifreiðar þegar ökumaður hennar var að fylla á hann metaneldsneyti. Sprengingin var öflug. Kastaðist ökumaðurinn frá bifreiðinni, tvö önnur ökutæki skemmdust einnig og tveir aðilar hlutu áverka.
Gangandi vegfarandi þveraði Höfðabakka rétt sunnan við biðstöð strætisvagna á móts við Árbæjarsafn þegar bifreið, sem ók til suðurs, var ekið á hann. Ökumaður bifreiðarinnar ók af vettvangi án þess að tilkynna um atvikið. Stuttu síðar var fólksbifreið ekið Höfðabakka til norðurs og á vegfarandann þar sem hann lá á götunni. Vegfarandinn sem ekið var á lést á Landspítala seinna um nóttina af völdum fjöláverka.
Rafhlaupahjóli var ekið austur Grettisgötu að Barónsstíg. Einstefna er vestur Grettisgötu. Á sama tíma var Mercedes Benz hópbifreið ekið norður Barónsstíg. Ökumaður rafhlaupahjólsins varð fyrir hópbifreiðinni og lést samstundis.
Gangandi vegfarandi gekk eftir Hofsbót og inn á mið gatnamót Strandgötu og Hofsbótar. Á sama tíma var fólksbifreið ekið Strandgötu í vinstri beygju inn á Hofsbót. Vegfarandinn varð fyrir bifreiðinni á miðjum gatnamótunum. Hann lést daginn eftir á Sjúkrahúsinu á Akureyri.
Bílvelta varð á Akrafjallsvegi skammt vestan við Innnesveg. Bifreið sem var ekið hratt í vesturátt rann til vinstri, í hægri beygju við framúrakstur, út fyrir veg og endastakkst nokkrum sinnum. Ökumaður var einn í bifreiðinni og lést hann í slysinu.
Bílvelta varð á Meðallandsvegi skammt sunnan Kirkjubæjarklausturs. Bifreið, sem ekið var hratt í norðausturátt, rann til vinstri í hægri beygju, út fyrir veg og endastakkst nokkrum sinnum. Farþegi í miðju aftursæti lést í slysinu.
Þann 21. júní 2022 var gangandi vegfarandi staddur á Víkurlandi á Djúpavogi. Meðfram 180 metra kafla af veginum er listaverk sem telur 34 stækkaðar eftirlíkingar af fuglaeggjum. Vegfarandinn var við eitt af eggjunum. Á sama tíma var vinnuvél ekið suður Víkurland frá hafnarbakka í Innri-Gleðivík áleiðis að fiskmarkaði Djúpavogs, um 1 km leið. Fiskfarmur í fjórum fiskikörum var á lyftaragöfflum vinnuvélarinnar. Vinnuvélinni var ekið á vegfarandann sem lést af völdum áverka sem af slysinu hlutust.
Kia Picanto fólksbifreið var ekið norðaustur Suðurlandsveg skammt vestan við Kúðafljót. Á sama tíma var Mercedes Benz sendibifreið ekið úr gagnstæðri átt vestur Suðurlandsveg. Kia bifreiðinni var ekið yfir á vinstri akrein og framan á sendibifreiðina í hörðum árekstri.
Vörubifreið með festivagn, sem ekið var austur Suðurlandsveg, fauk á hliðina og út af veginum. Farþegi í bifreiðinni lést af völdum áverka sem af slysinu hlutust.
Nemandi við Framhaldsskólann á Laugum renndi sér á snjóþotu niður bratta brekku vestan við skólann og upp á Austurhlíðarveg. Á sama tíma var fólksbifreið ekið til suðurs eftir Austurhlíðarvegi og á nemandann á snjóþotunni. Nemandinn lést af völdum áverka sem af slysinu hlutust. Skýrsluna má finna hér: Framhaldsskólinn á Laugum.
Toyota Land Cruiser bifreið var ekið austur Suðurlandsveg, um 1,2 km austan við Þingborg. Á sama tíma var Volvo XC 60 fólksbifreið ekið úr gagnstæðri átt vestur Suðurlandsveg í framúrakstri á vinstri akrein og framan á Toyota bifreiðina í hörðum árekstri.
Vegfarandi gekk á grænu gönguljósi út á gangbraut sem liggur þvert yfir Gnoðarvog rétt vestan gatnamótanna við Skeiðarvog. Strætisvagni var á sama tíma ekið suðvestur Skeiðarvog og beygt til hægri, einnig á grænu ljósi, norðvestur inn á Gnoðarvog. Vegfarandinn varð undir hægri hlið strætisvagnsins og lést í slysinu.
Bifreið var ekið niður brattan veg í átt að Látravík. Ökumaðurinn missti stjórn á bifreiðinni þannig að hún fór út af veginum úr miðri beygju og niður fyrir hann þar sem hún valt. Ökumaðurinn var einn í bílnum og lést hann í slysinu.
Rafhlaupahjóli og rafknúnu léttu bifhjóli var ekið úr gagnstæðum áttum á hjólastíg við Sæbraut. Rákust hjólin saman í hörðum árekstri með þeim afleiðingum að ökumaður rafhlaupahjólsins lést og ökumaður létta bifhjólsins slasaðist alvarlega.
Ökumaður pallbifreiðar ók suður Hvalfjarðarveg. Við félagsheimilið Félagsgarð missti hann stjórn á bifreiðinni í hálku með þeim afleiðingum að hún fór út fyrir veginn og valt. Einn farþegi var í bifreiðinni og köstuðust bæði ökumaður og farþegi út úr bifreiðinni í veltunni. Þeir voru ekki spenntir í öryggisbelti og lést farþeginn í slysinu.
Gangandi vegfarandi gekk út á akrein í veg fyrir bifreið. Vegfarandinn var ekki á merktri leið fyrir gangandi vegfarendur. Hann gerði sér sennilega ekki grein fyrir að á akreininni næst honum var grænt ljós fyrir akstursleið bifreiðarinnar, en á fjær akreininni var bifreið kyrrstæð á móti rauðu beygjuljósi. Vegfarandinn lést af völdum áverka sem af slysinu hlutust.
Maður féll af reiðhjóli sínu og slasaðist alvarlega snemma morguns eða seint um nótt. Hann fannst liggjandi meðvitundarlaus við gangstíg milli Seljaskóga og Engjasels. Maðurinn lést nokkru síðar á sjúkrahúsi.
Bifreið var ekið út Skötufjörð í átt að Ísafirði. Ökumaðurinn missti stjórn á bifreiðinni þannig að hún snerist, rann út af veginum og valt niður í sjó. Tveir farþegar létust í slysinu.
Ökumaður fólksbifreiðar missti stjórn á bifreið sinni og ók út af Heydalsvegi rétt handan við vegræsi. Ökumaðurinn reyndi að aka bifreiðinni aftur upp á veginn en tók ekki eftir vegræsinu og endastakst bifreiðin niður í hyl við ræsisopið. Tveir einstaklingar voru í bílnum og annar þeirra lést.
Ökumaður á bifhjóli var á austurleið rétt vestan við Stigá. Stuttu áður en hann kom að brúnni byrjaði hjólið að skjálfa eða skakast til með þeim afleiðingum að ökumaðurinn missti stjórn á því, féll og rann eftir veginum. Hann rakst utan í bifreið sem ekið var úr gagnstæðri átt og kastaðist út fyrir veg. Ökumaðurinn lést af völdum áverka sem hann hlaut í slysinu.
Ökumaður fólksbifreiðar ók ölvaður á ofsahraða norður Norðausturveg. Skammt sunnan við vegamótin að Hófaskarðsleið missti ökumaðurinn stjórn á bifreiðinni með þeim afleiðingum að bifreiðin fór út af veginum og valt. Ökumaðurinn, sem var einn í bifreiðinni, lést í slysinu.
Síðdegis þann 10. júlí 2020 ók ökumaður á norðausturleið við vegamót Auðsholtsvegar og Skeiða- og Hrunamannavegar yfir á rangan vegarhelming til að forðast aftanákeyrslu á bifreið við vegamótin þar sem ökumaður þeirra bifreiðar var að undirbúa vinstri beygju. Á sama tíma kom bifreið úr gagnstæðri átt og varð harður árekstur með þeim afleiðingum að ökumaðurinn sem ók á röngum vegarhelmingi lést af völdum áverka sem hann hlaut í slysinu.
Fjórum bifhjólum var ekið suður Vesturlandsveg. Ökumaður fremsta hjólsins missti stjórn á hjóli sínu á hálu nýlögðu malbiki og féll hjólið í götuna. Auk ökumanns var einn farþegi á hjólinu og runnu hjólið, ökumaðurinn og farþeginn yfir á rangan vegarhelming framan á bifreið sem ekið var úr gagnstæðri átt. Bæði ökumaður og farþegi bifhjólsins létust í slysinu. Ökumaður næstfremsta bifhjólsins missti einnig stjórn á hjóli sínu vegna ástands malbiksins. Hann rann út af veginum og slasaðist.
Ökumaður undir áhrifum fíkniefna og sljóvgandi lyfja missti stjórn á bifreið sinni á frárein frá Reykjanesbraut að Dalvegi þegar ökumaður sem skipti um akrein ók í veg fyrir hann. Bifreiðin hafnaði með hægri hlið á ljósastaur á mikilli ferð með þeim afleiðingum að farþegi lét lífið af völdum áverka sem af slysinu hlutust.
Fólksbifreið sem ekið var vestur Reykjanesbraut við Álverið í Straumsvík rann í veg fyrir vörubifreið með snjótönn sem ekið var úr gagnstæðri átt. Ökumaður fólksbifreiðarinnar lést í slysinu.
Vörubifreið var ekið suður Vesturlandsveg í Kollafirði á sama tíma og gámaflutningabifreið með tengivagni var ekið úr gagnstæðri átt. Rétt áður en bifreiðarnar mættust féll gámur af tengivagninum í veg fyrir vörubifreiðina. Ökumaður vörubifreiðarinnar hlaut alvarlega áverka við áreksturinn. Tengivagninn sveiflaðist til aftan í gámabifreiðinni og rakst á fólksbifreið sem ekið var á eftir vörubifreiðinni. Ökumaður hennar hlaut einnig alvarlega áverka.
Síðdegis þann 21. nóvember 2019 var ekið á gangandi vegfaranda á Suðurlandsvegi við Viðborðssel með þeim afleiðingum að hann lést af völdum áverka sem af slysinu hlutust.
Bifreið sem ekið var vestur Snæfellsnesveg var ekið út af veginum hægra megin þar sem hún valt í vegfláanum. Tveir farþegar köstuðust út úr bifreiðinni, báðir hlutu alvarlega áverka og lést annar þeirra á sjúkrahúsi.
Ökumaður fólksbifreiðar ók yfir á rangan vegarhelming í veg fyrir bifreið sem ekið var úr gagnstæðri átt. Farþegi í bifreiðinni sem ekið var yfir á rangan vegarhelming lést af völdum áverka sem af slysinu hlutust. Að sögn beggja ökumannanna kom kröftug vindhviða á bifreiðarnar rétt fyrir slysið.
Bifhjóli var ekið yfir blindhæð. Handan við hæðina voru kyrrstæðar bifreiðar á veginum í sömu akstursstefnu, í bið eftir að komast yfir einbreiða brú. Ökumaður bifhjólsins nauðhemlaði en féll af hjólinu og kastaðist aftan á öftustu bifreiðina við brúna. Lést hann á vettvangi.
Ökumaður veghefils lést eftir að hann missti stjórn á heflinum við vinnu í brekku á Sandheiði á Ingjaldssandsvegi. Ökumaðurinn lést af völdum áverka sem af slysinu hlutust.
Ökumaður fólksbifreiðar ók of hratt og missti stjórn á bifreiðinni með þeim afleiðingum að bifreiðin fór út af veginum og valt. Ökumaðurinn, sem var einn í bifreiðinni, lést af völdum áverka sem af slysinu hlutust.
Ökumaður ók Toyota bifreið inn á brúna yfir Núpsvötn þar sem hann missti stjórn á bifreiðinni.
Ökumaðurinn ók of hratt miðað við aðstæður og hámarkshraða á þessum stað. Bifreiðin fór upp á
vegriðið á brúnni hægra megin miðað við akstursátt og losnaði vegriðið frá brúnni með þeim afleiðingum að bifreiðin fór út af henni og lenti í grýttum aur fyrir neðan.
Þrír farþegar í bifreiðinni létust í slysinu og voru þeir ekki í öryggisbeltum eða með annan viðeigandi
öryggisbúnað.
Ökumaður pallbifreiðar missti stjórn á bifreiðinni með þeim afleiðingum að hún fór út af veginum og valt. Ökumaðurinn, sem var undir áhrifum áfengis, lést í slysinu.
Ökumaður fólksbifreiðar ók yfir á rangan vegarhelming á Reykjanesbraut við Tjarnarvelli í veg fyrir fólksbifreið sem ekið var úr gagnstæðri átt. Sennilega sofnaði ökumaðurinn við aksturinn. Farþegi í sömu bifreið, var ekki spenntur í öryggisbelti og lést af áverkum sem af slysinu hlutust.
Ökumaður Mitsubishi bifreiðar ók fram úr nokkrum bifreiðum á Þingvallavegi á akrein fyrir umferð úr gagnstæðri átt og ók hann aftan á Suzuki bifreið. Ökumaður Suzuki bifreiðarinnar var að taka vinstri beygju út af veginum. Farþegi í Suzuki bifreiðinni lést í slysinu.
Ökumaður fjórhjóls missti stjórn á hjólinu sem hafnaði ofan í læk og fannst ökumaður síðar látinn undir hjólinu.
Ökumaður sendibifreiðar missti stjórn á bifreiðinni með þeim afleiðingum að hún fór út fyrir veg og lenti á stóru grjóti sem hafði fallið úr hlíð fyrir ofan veginn ofan í vatnsrás við veginn. Ökumaðurinn lést í slysinu.
Ökumaður hópbifreiðar missti stjórn á bifreiðinni með þeim afleiðingum að bifreiðin fór út af veginum á nokkurri ferð. Þegar bifreiðin var hálf inni á veginum hægra megin og hálf utan hans rann hún yfir heimreið, sem liggur þvert á veginn, og þaðan yfir árfarveg þar sem hún hafnaði á árbakkanum hinum megin árinnar. Ökumaðurinn lést á spítala tæpum mánuði eftir slysið af völdum áverka sem hann hlaut í slysinu.
Fólksbifreið var ekið yfir á rangan vegarhelming í framúrakstri beint framan á bifreið sem ekið var úr gagnstæðri átt. Ökumaður fólksbifreiðarinnar sem ók yfir á rangan vegarhelming lést í slysinu. Í hinni bifreiðinni voru átta farþegar auk ökumanns, þar af sjö á barnsaldri. Allir hlutu einhver meiðsli og fjögur þeirra hlutu mikil meiðsli.
Mercedes Benz bifreið var ekið vestur Suðurlandsveg skammt vestan við Markarfljót þegar Kia
bifreið sem ekið var austur Suðurlandsveg var ekið yfir á rangan vegarhelming og framan á
Mercedes Benz bifreiðina. Ökumaður Mercedes Benz bifreiðarinnar lést í slysinu en ökumaður og
farþegar Kia bifreiðarinnar hlutu ekki lífshættulega áverka.
Toyota Yaris bifreið ekið vestur Suðurlandsveg að Höfðabrekku.
Þegar bifreiðinni var ekið yfir blindhæð á þjóðveginum skammt austan við Höfðabrekku varð stefnubreyting á bifreiðinni þannig að hún fór út fyrir veginn hægra megin miðað við akstursstefnu.
Bifreiðin snérist í vegkantinum og valt nokkrum sinnum.
Að sögn björgunaraðila, sem kallaðir voru til vegna slyssins, var mjög hvasst þegar þeir komu á vettvang.
Farþegar í bifreiðinni hlutu minniháttar meiðsl í slysinu en ökumaður bifreiðarinnar lést
af völdum áverka sem hann hlaut.
Nissan bifreið á leið vestur Lyngdalsheiðarveg var ekið yfir á rangan vegarhelming í veg fyrir vörubifreið sem ekið var úr gagnstæðri átt. Ökumaður og farþegi í Nissan bifreiðinni létust í slysinu.
Sennilegt er að ökumaður Nissan bifreiðarinnar hafi sofnað eða misst athygli frá akstrinum af óþekktum ástæðum.
Ökumaður Subaru bifreiðar missti stjórn á bifreið sinni með þeim afleiðingum að
bifreið hans fór yfir á öfugan vegarhelming í veg fyrir Ford bifreið sem ekið var úr
gagnstæðri átt. Bifreiðarnar lentu saman í hörðum árekstri og lést ökumaður Subaru
bifreiðarinnar vegna fjöláverka.
Ökumaður fólksbifreiðar ók yfir á rangan vegarhelming í veg fyrir vörubifreið sem kom úr gagnstæðri átt. Ökumaður fólksbifreiðarinnar lést í slysinu.
Um kl. 11 miðvikudaginn 27. desember ók hópbifreið aftan á fólksbifreið á Suðurlandsvegi vestan Hunkubakka. Í kjölfar árekstursins missti ökumaður hópbifreiðarinnar hjól út fyrir veg og valt á hliðina. Um borð voru 46 manns og létust tveir farþegar og nokkrir hlutu alvarlega áverka. Margir farþeganna og ökumaður voru ekki spenntir í öryggisbelti.
Ökumaður sendibifreiðar missti stjórn á henni með þeim afleiðingum að bifreiðin rakst á mikilli ferð utan í vegrið. Ökumaðurinn, sem var undir áhrifum fíkniefna og áfengis, var ekki spenntur í öryggisbelti og kastaðist hann út úr bifreiðinni. Hann lést í slysinu.
Reiðhjólamaður hjólaði inn á Sæbraut gegn rauðu gönguljósi og rakst hann utan í hlið Ford bifreiðar sem ekið var austur Sæbraut. Ford bifreiðin var með Audi bifreið í drætti þegar slysið átti sér stað og varð reiðhjólamaðurinn í kjölfarið fyrir Audi bifreiðinni.
Reiðhjólamaðurinn lést af völdum áverka sem hann hlaut í slysinu.
Bifreið var ekið út af ferjubryggju á Árskógssandi og hafnaði hún í sjónum. Í bifreiðinni var ökumaður og tveir farþegar og létust þau í slysinu. Ökumaður hefur sennilega misst meðvitund við aksturinn af óþekktum ástæðum.
Að kvöldi 28. ágúst 2017 féll farþegi út úr leigubifreið á ferð. Hann lést af völdum áverka sem af slysinu hlutust nokkrum dögum síðar á spítala.
Seinni part dags þann 29. júní 2017 var Nissan bifreið ekið yfir á rangan vegarhelming á Norðurlandsvegi í Öxnadal og lenti framan á Suzuki bifreið sem ekið var á móti.
Vegurinn var með nýlögðu bundnu slitlagi og var ekki búið að mála miðlínur þegar slysið átti sér stað.
Ökumaður Nissan bifreiðarinnar lést í kjölfar slyssins en farþegi í Nissan bifreiðinni og ökumaður Suzuki bifreiðarinnar slösuðust ekki alvarlega.
Jeppabifreið með hjólhýsi í eftirdragi var ekið austur Þjóðveg 1 við Freysnes. Miklar vindhviður urðu til þess að hjólhýsið tók að sveiflast til með þeim afleiðingum að hjólhýsið og bifreiðin ultu. Ökumaður sem var ekki með öryggisbelti spennt kastaðist út úr bifreiðinni og lést af völdum fjöláverka.
Bifreið sem ekið var vestur Álfhellu var beygt í veg fyrir bifhjól sem kom á mikilli ferð úr gagnstæðri átt. Ökumaður bifhjólsins kastaðist af hjólinu í slysinu og hlaut banvæna áverka. Í skýrslunni birtir nefndin tillögu í öryggisátt um ökuréttindi og ökutækjaskrá.
Hjólreiðamaður var einn á ferð á reiðhjóli á Nesjavallaleið eftir hádegi mánudaginn 22. maí 2017. Hann missti jafnvægið og féll af hjólinu. Hann var ekki með hjálm og hlaut banvæna höfuðáverka í slysinu. Að mati nefndarinnar eru líkur á að maðurinn hefði lifað slysið af hefði hann verið með hjálm.
Drengur ók torfæruhjóli inn á Eyjafjarðarbraut í veg fyrir bifreið. Drengurinn lést í slysinu. Í skýrslunni birtir nefndin tillögu í öryggisátt varðandi skert útsýn vegna trjáa.
Þann 5. mars 2017 var Toyota bifreið ekið suður Grindavíkurveg. Ökumaður bifreiðarinnar missti stjórn á bifreiðinni með þeim afleiðingum að bifreiðin hafnaði utan vegar og valt. Ökumaður, sem var ekki spenntur í öryggisbelti, kastaðist út úr bifreiðinni og lést af völdum fjöláverka. Ökumaður var undir áhrifum áfengis og svefnlyfja þegar slysið átti sér stað.
Toyota Corolla bifreið var ekið vestur Reykjanesbraut þegar Toyota Land Cruiser bifreið sem kom úr gagnstæðri átt var ekið yfir miðlínu í veg fyrir Corolla bifreiðina. Ökumaður Corolla bifreiðarinnar beygði til vinstri til að reyna að koma í veg fyrir árekstur en á sama tíma beygði ökumaður Land Cruiser bifreiðarinnar aftur inn á réttan vegarhelming þannig að árekstur varð á milli bifreiðanna. Farþegi í Corolla bifreiðinni lést í slysinu.
Ökumaður fólksbifreiðar missti stjórn á bifreið sinni í hálku. Bifreiðin snérist og rann á hlið framan á aðra fólksbifreið sem kom úr gagnstæðri átt. Ökumaður fyrrnefndu bifreiðarinnar lést í slysinu.
Síðdegis þann 23. desember 2016 kom vegfarandi um þjóðveg 1 við Heiðarenda að Suzuki Grand Vitara bifreið sem hafði hafnað utan vegar og oltið. Engin vitni voru að slysinu. Vegfarandinn var á bifreið sem útbúin var sterkum ljóskösturum og sá þannig glampa af Suzuki bifreiðinni þar sem hún var á hvolfi fyrir utan veginn.
Ökumaður Suzuki bifreiðarinnar lést í slysinu.
Eftir hádegi þann 22. desember 2016 lentu Suzuki bifreið og Toyota bifreið saman á Holtavörðuheiði. Þeim var ekið í gagnstæðar áttir og var Toyota bifreiðinni ekið inn á rangan vegarhelming og lentu vinstri framhorn bifreiðanna saman. Bifreiðarnar snérust við áreksturinn og stöðvuðust þær utan vegar.
Ökumaður Toyota bifreiðarinnar lést í slysinu.
Ökumaður Kia bifreiðar hafði numið staðar á vegöxl við Vesturlandsveg. Skyndilega ók hann inn á akbrautina í vinstri beygju, þvert á tvær akreinar fyrir umferð í átt til Reykjavíkur. Ökumaður Jaguar bifreiðar á vinstri akrein á leið til Reykjavíkur reyndi að sveigja frá Kia bifreiðinni án árangurs og lenti bifreiðin á vinstri hlið Kia bifreiðarinnar. Ökumaður Kia bifreiðarinnar hlaut fjöláverka í slysinu og lést á sjúkrahúsi daginn eftir. Í skýrslunni beinir nefndin þeirri tillögu til veghaldara að aðgreina betur akstursáttir þar sem slysið átti sér stað.
Þann 30. október 2016 hafði Toyota bifreið verið ekið Suðurlandsveg í vesturátt skammt frá Fagurhólsmýri. Vegurinn á þessum stað liggur í hægri beygju miðað við akstursátt ökumanns og lenti bifreiðin útaf veginum vinstra megin. Bifreiðin rakst síðan á brattan bakka og kastaðist við það nokkra vegalengd og valt í kjölfarið.
Ökumaður, sem var ekki spenntur í öryggisbelti, kastaðist út úr bifreiðinni. Hann hlaut banvæna fjöláverka og lést á slysstað.
Um miðjan dag 17. október 2016 lést ökumaður fólksbifreiðar í hörðum árekstri tveggja bifreiða á Reykjanesbraut skammt austan við Rósaselstorg. Ökumaðurinn sem lést var ekki spenntur í öryggisbelti og var undir áhrifum ólöglegra fíkniefna þegar slysið átti sér stað.
Snemma morguns hinn 14. október 2016 var maður að bera út blöð á bifreið sinni. Hafði hann
stöðvað bifreiðina og stigið út en hún rann síðan af stað. Hann klemmdist milli stafs og hurðar
þegar hann var að reyna að stöðva bifreiðina. Ökumaðurinn lést af völdum áverka sem hann
hlaut í slysinu.
Að kvöldi 17. september 2016 var ekið á mann sem stóð á þjóðvegi 1 á Sólheimasandi með þeim afleiðingum að hann lést. Slysstaður er við slóða sem liggur að vinsælum ferðamannastað, en slóðinn var lokaður fyrir umferð ökutækja. Myrkur var og þegar slysið átti sér stað var staðurinn ómerktur, óupplýstur og án bílastæða.
Rétt fyrir miðnætti laugardaginn 17. september 2016 var bifreið ekið út af Útnesvegi á Snæfellsnesi þar sem hún valt nokkrar veltur. Tveir aðilar voru í bifreiðinni, báðir þreyttir, undir áhrifum áfengis og ekki spenntir í öryggisbelti. Annar þeirra kastaðist út úr bifreiðinni og lést af völdum áverka sem af hlutust. Hinn kastaðist til og að hluta út úr bifreiðinni, hann hlaut alvarleg meiðsli.
Þann 4. september 2016 var Nissan bifreið ekið norður Ólafsfjarðarveg. Á móts við Skíðadal var bifreiðinni ekið yfir miðlínu vegarins inn á rangan vegarhelming. Bifreiðin ók utan í ökumannshlið Jeep Wrangler bifreiðar sem ekið var úr gagnstæðri átt og utan í kerru sem hún var með í eftirdragi.
Nissan bifreiðin hafnaði síðan á Audi bifreið sem var ekið fyrir aftan Jeep bifreiðina.
Farþegi í aftursæti Nissan bifreiðarinnar lést í slysinu.
Upp úr hádegi 20. ágúst 2016 varð harður árekstur tveggja bifreiða á Þingskálavegi við Geldingalæk. Ökumaður Skoda fólksbifreiðar ók yfir á rangan vegarhelming í veg fyrir Toyota sendibifreið sem ekið var úr gagnstæðri átt. Ökumaður Skoda bifreiðarinnar lést í slysinu og ökumaður sendibifreiðarinnar slasaðist talsvert.
Snemma að morgni 7. júlí 2016 var vörubifreið ekið inn á Reykjanesbraut frá Hafnavegi í veg fyrir bifhjól með þeim afleiðingum að ökumaður bifhjólsins lést.
Ökumaður undir slævandi áhrifum lyfja ók alltof hratt og keyrði aftan á fólksbifreið á þjóðvegi 1 á Öxnadalsheiði með þeim afleiðingum að fólksbifreiðin lenti framan á hópbifreið sem kom úr gagnstæðri átt. Ökumaður fólksbifreiðarinnar lést í slysinu. Rannsóknarnefnd samgönguslysa beinir því til Samgöngu- og sveitastjórnarráðuneytisins að skipaður verði hópur fagaðila á sviði réttarfars og refsivörslu og meðferðar við áfengis- og fíkniefnasýki, sem falið verði að vinna tillögur um ný úrræði gegn ölvunar- og lyfjaakstri.
Upp úr hádegi 20. júní 2016 valt vörubifreið með festivagn í eftirdragi út fyrir veg á Suðurlandsvegi í Mýrdal og lést ökumaður bifreiðarinnar í slysinu. Slysið varð neðarlega í brekku niður af Reynisfjalli í krappri beygju. Rannsókn á slysinu leiddi í ljós að frumorsök slyssins mátti rekja til þess að hemlar festivagnsins voru í afar bágbornu ástandi. Í skýrslunni birtir nefndin tillögur í öryggisátt um viðgerðir og viðhald þungra ökutækja, öryggi vegarins og skoðunarhandbók ökutækja.
Þann 5. júní 2016 varð harður árekstur tveggja bifreiða í Hvalfjarðargöngunum um 700 metra fyrir innan syðri munna ganganna. Ökumaður Toyota bifreiðar á suðurleið ók yfir á rangan vegarhelming í veg fyrir Subaru bifreið á norðurleið. Farþegi í framsæti Subaru bifreiðarinnar lést í slysinu. Ökumenn beggja bifreiða og farþegar í Toyota bifreiðinni slösuðust mikið.
Í skýrslunni beinir nefndin því til veghaldara að kanna með möguleika á að breikka rifflur á milli akstursátta. Jafnframt beinir nefndin því til veghaldara að leita leiða til að auka vitund ökumanna á nauðsyn þess að viðhalda nægilegu bili milli ökutækja í göngunum.
Ökumaður bifhjóls á leið austur Þingvallaveg missti stjórn á bifhjólinu við brúna yfir Leirvogsá. Hann féll af hjólinu eftir að hafa borist á því utan í vegriðinu inn á miðja brúna. Hann hlaut banvæna fjöláverka og lést á slysstað. Rannsóknarnefnd samgönguslysa beinir því til bifhjólamanna að virða settan hámarkshraða og aka ekki hraðar en reynsla þeirra leyfir og aldrei yfir hámarkshraða. Nefndin hefur nú rannsakað þrjú banaslys bifhjólamanna á Þingvallavegi og má rekja tvö þeirra til hraðaksturs.
Ökumaður fólksbifreiðar ók norður Holtavörðuheiði seint að nóttu en með honum í bifreiðinni voru tveir farþegar, í framsæti og aftursæti. Ökumaður missti stjórn á bifreiðinni eftir vinstri beygju og ók út af veginum. Bifreiðin valt utan vegar og kastaðist farþegi í aftursæti út úr bifreiðinni. Hann notaði ekki bílbelti, hlaut banvæna fjöláverka og lést á slysstað. Við rannsókn slyssins kom í ljós að ökumaður var undir áhrifum áfengis- og vímuefna og var óhæfur til aksturs. Hann var ennfremur ökuréttindalaus. Bíltækniskoðun leiddi í ljós að spindilkúla við vinstra framhjól var brotin. Að mati bíltæknisérfræðinga hafði kúlan verið brotin í nokkurn tíma. Mögulegt er að kúlan hafi hrokkið úr sæti og bifreiðin orðið stjórnlaus við það. Hraðaútreikingar RNSA benda til þess að ökutækinu hafi verið ekið langt yfir hámarkshraða eða á 132 km/klst +/- 9 km/klst.
Síðdegis 17. febrúar 2016 var bifreið ekið fram af hafnarbakkanum í Ólafsvík. Ökumaðurinn hafði ætlað að leggja bifreið sinni upp við hafnarkantinn, en steig líklega á inngjöf eða gaf harkalegar inn en hann ætlaði sér. Upp við hafnarkantinn hafði snjór þjappast saman og myndað nokkurs konar ramp upp á kantinn. Bifreiðin fór fram af bryggjunni og hafnaði í sjónum með þeim afleiðingum að ökumaðurinn drukknaði.
Síðdegis 21. janúar 2016 varð harður árekstur á Njarðarbraut við gatnamótin að Tjarnarbraut í Reykjanesbæ. Ökumaður bifreiðar tók vinstri beygju í veg fyrir aðra bifreið sem kom úr gagnstæðri átt. Hann var ekki spenntur í öryggisbelti og lést í slysinu. Rannsóknarnefnd samgönguslysa birtir tvær tillögur í öryggisátt vegna slyssins hér í skýrslunni. Önnur varðandi yfirborðsmerkingar á Njarðarbraut og hin um skoðun ökutækja.
Um miðjan dag 26. desember 2015 varð harður árekstur milli tveggja bílaleigubifreiða á einbreiðri brú yfir Hólá í Öræfum. Að mati Rannsóknarnefndar samgönguslysa sýndi annar ökumannanna af sér mikla óvarkárni þegar hann ók allt of hratt að brúnni án þess að sjá nægjanlega fram á veginn og olli árekstrinum. Ökumaður hinnar bifreiðarinnar lést í slysinu. Rannsóknarnefnd samgönguslysa gerir tvær tillögur í öryggisátt varðandi einbreiðar brýr á þjóðvegum.
Snemma að morgni 21. desember 2015 var ekið aftan á hjólreiðamann á Vesturlandsvegi vestan Höfðabakka. Hjólreiðamaðurinn lést í slysinu. Í skýrslunni birtir Rannsóknarnefnd samgönguslysa þrjár tillögur í öryggisátt. Nefndin leggur til að lagt verði bann við hjólreiðum á umferðarmiklum fjölakreinavegum á höfuðborgarsvæðinu, að reglugerð um gerð og búnað reiðhjóla verði tekin til endurskoðunar og brýnt verði á reglum um aukahluti í sjónsviði ökumanna bifreiða. Í skýrslunni er einnig ábending til bæði ökumanna og hjólreiðamanna um sýnileika og akstur í skammdeginu.
Ökumaður Toyota Corolla bifreiðar ók austur Suðurlandsveg. Skömmu áður en hann kom að Lækjarbotnum ók hann yfir miðlínu vegarins og utan í Toyota Land Cruiser bifreið sem kom úr gagnstæðri átt, vestur Suðurlandsveg. Svo virðist sem ökumaður Toyota Corolla bifreiðarinnar hafi ekki hemlað við atvikið en haldið akstrinum áfram og rekist framan á Subaru Legacy bifreið sem var næst á eftir Toyota Land Cruisernum. Varð harður árekstur og hlaut ökumaður Toyota Corolla bifreiðarinnar banvæna áverka. Við rannsókn kom í ljós að hann hafði fengið hjartaáfall undir stýri í aðdraganda árekstranna
Síðdegis 24. október 2015 varð barn fyrir jeppabifreið á malarplani fyrir framan sveitabæ á Suðurlandi. Slysið bar að með þeim hætti að barnið var fyrir framan bifreiðina þegar henni var ekið af stað. Hæð vélarhlífar bifreiðarinnar varð þess valdandi að ökumaður sá barnið ekki áður en hann ók af stað.
Ökumaður og farþegar, erlendir ferðamenn, voru á leið frá Reykjavík austur að Vík í Mýrdal. Skammt vestan við brú yfir ána Klifanda missti ökumaður stjórn á bifreiðinni og fór útaf með hjól í hægri malarkant. Ökumaður brást við með því að stýra bifreiðinni skarplega til vinstri. Við það varð hægri framhjólbarði loftlaus og fór bifreiðin út af vinstra megin. Í slysinu lést 66 ára kona en hún var farþegi í hægra aftursæti. Hún notaði ekki bílbelti og kastaðist út úr bifreiðinni í slysinu.
Slysið varð við Jökulsárlón á malarplani norðan þjónustubyggingarinnar. Ökumaður hjólabáts hafði nýlokið við að sækja farþega á vestanverðu planinu og var að bakka í austurátt. Á sama tíma stóðu þrír erlendir ferðamenn á planinu austanverðu og fylgdust með þyrlu sem var að lenda á mel þar nálægt. Skipstjóri hjólabátsins bakkaði á fólkið þar sem það stóð og horfði á þyrluna. Þau féllu öll við og varð einn þeirra undir afturhjóli bátsins og lést samstundis.
Brú yfir Vatnsdalsá við bæinn Grímstungu hrundi undan þunga vörubifreiðar með festivagn. Rannsókn málsins leiddi í ljós að þungi vagnlestarinnar var vel yfir leyfðri heildarþyngd ökutækja á brúnni. Við rannsóknina komu einnig í ljós ýmsir annmarkar á öryggismálum og gerir nefndin þrjár tillögur í öryggisátt sem birtar eru í skýrslunni.
Slysið varð á í norðanverðum Seyðisfirði seint um kvöld. Fólksbifreið var ekið suður veginn í átt að bænum þegar ökumaður missti stjórn á bifreiðinni til vinstri, að því er virðist snögglega og fór í hliðarskriði vestur útaf veginum. Bifreiðin valt niður bratta hlíð og hafnaði um 20 metrum fyrir neðan veginn. Farþegi í framsæti bifreiðarinnar kastaðist út úr henni og lést. Hann notaði ekki bílbelti. Ökumaður, 17 ára stúlka slasaðist alvarlega. Telur rannsóknarnefndin að ástand vegarins, ástand höggdeyfa bifreiðarinnar og reynsluleysi ökumanns séu samverkandi orsakaþættir slyssins. Gerir nefndin tvær tillögur í öryggisátt í skýrslunni, varðandi dæmingu höggdeyfa í aðalskoðun og ástand og hámarkshraða á malarvegum. Þá beinir nefndin því til ökumanna og farþega að nota ávallt bílbelti.
Að morgni 28. maí missti ökumaður stjórn á bifreið sinni á Útnesvegi við Hellissand með þeim afleiðingum að hún valt. Í bílnum voru fimm farþegar. Farþegi í framsæti lést í slysinu og annar farþegi kastaðist út úr bifreiðinni og hlaut lífshættulega fjöláverka. Rannsóknarnefnd samgönguslysa gerir tvær tillögur í öryggisátt í skýrslunni varðandi yfirborðsmerkingar og merkingar hámarkshraða.
Síðdegis 25. maí 2015 missti erlendur ferðamaður á bifhjóli stjórn á því á malarvegi með þeim afleiðingum að hjólið fór út fyrir veginn og valt ofan á ökumanninn og farþega þegar það stöðvaðist. Ökumaðurinn lést í slysinu en farþeginn hlaut lítil meiðsli.
Ökumaður Nissan Qashqai bílaleigubifreiðar ók vestur Biskupstungnabraut rétt upp úr hádegi. Kvaðst hann þá hafa veitt athygli Volkswagen Golf bifreið sem kom úr gagnstæðri átt og leitaði yfir miðlínu, yfir á hans vegarhelming. Reyndi hann að sveigja frá til hægri út í kant en hin bifreiðin ók viðstöðulaust á móti honum þar til bílarnir rákust saman. Við áreksturinn lést ökumaður Volkswagen Golf bifreiðarinnar, sem var karlmaður fæddur 1949. Við rannsókn málsins komu ekki fram vísbendingar um að orsök slyssins gæti verið vegna bilunar í búnaði bifreiða eða ástands vegar. Telur rannsóknarnefndin sennilegustu skýringuna að ökumaður Volkswagen Golf bifreiðarinnar hafi sofnað við aksturinn.
Að kvöldi 9. apríl 2015 missti ökumaður fólksbifreiðar stjórn á henni í mikilli hálku með þeim afleiðingum að hún rann út af Biskupstungnabraut sunnan við Alviðru og valt. Í veltunni köstuðust tveir farþegar út úr bifreiðinni og lést annar þeirra í slysinu. Sá sem lést hafði verið í farangursrými bifreiðarinnar. Farþegar voru fimm, einum fleiri en bifreiðin var gerð fyrir. Í skýrslunni er tillaga í öryggisátt varðandi skoðunarhandbók ökutækja og ábendingar um notkun öryggisbelta og akstur við vetraraðstæður.
Slysið varð á malarvegi sem liggur í vesturátt frá Meðallandsvegi við bæinn Grund. Ökumaður New Holland dráttarvélar með TIM sturtuvagn ók veginn áleiðis að malarnámu. Í dráttarvélinni voru tveir ungir drengir auk ökumanns. Þegar ökumaður ók út úr vinstri beygju sem þarna er jók hann aðeins við hraðann. Á sama tíma tók annar drengurinn í hliðarslá og hurðaropnun sem er á henni og við það opnaðist hurðin. Drengurinn féll út úr dráttarvélinni, varð undir sturtuvagni sem dráttarvélin dró, og lést samstundis.
Slysið varð á Suðurlandsvegi í Eldhrauni að morgni til. Ökumaður og farþegi, báðir erlendir ferðamenn, voru á leið frá Vík í Mýrdal austur að Skaftafelli. Skammt vestan við Kirkjubæjarklaustur missti ökumaður stjórn á bifreiðinni og fór útaf vinstra megin. Í slysinu lést tvítug kona, farþegi í framsæti. Ekki er vitað hvort farþegi notaði bílbelti en af áverkum að dæma er sennilegt að hann hafi ekki notað bílbelti eða verið með beltið spennt fyrir aftan bak. Erlendir ferðamenn eru flestir reynslulitlir í akstri við aðstæður sambærilegar og finnast á Íslandi. Rannsóknarnefndin telur mikilvægt að Samgöngustofa fái aukið fjármagn til fræðslu erlendra ferðamanna um akstur og aðstæður vega á Íslandi, jafnt sumar sem vetur.
Slysið varð á annari hæð bílastæðashúss við Mjóstræti þann 18. mars 2015. Ökumaður fólksbifreiðar, 89 ára karlmaður, var á leið út úr bílastæðahúsinu er hann ók á burðarsúlu sem þar er. Samkvæmt sjúkragögnum hafði ökumaður átt við heilbrigðisvandamál að stríða. Vegna slyssins vísar RNSA í fyrri tillögu í öryggisátt, er varðar heilbrigðisvandamál og endurnýjun ökuréttinda. Tillagan kemur fram í skýrslu um banaslys sem átti sér stað á Nauthólsvegi, 15. febrúar 2015.
Ökumaður fólksbifreiðar ók norður Nauthólsveg. Er hann nálgaðist gatnamót Nauthólsvegar og Hringbrautar ók hann upp á umferðareyju og stöðvaðist þar snögglega á háum kantsteini þar sem hæðarmismunur er á götunni og umferðareyjunni. Ökumaður, 77 ára karlmaður, var fluttur slasaður á bráðamóttöku. Hann notaði ekki bílbelti og kastaðist með bringu fram á stýri bifreiðinnar. Slysið varð þann 15.2.2015 en ökumaður lést fjórum dögum síðar þann 19.2.2015. Samkvæmt sjúkragögnum átti ökumaður við veruleg heilbrigðisvandamál að stríða. Vegna slyssins gerir RNSA tillögu í öryggisátt er varðar heilbrigði og endurnýjun ökuréttinda.
Börnum í öðrum bekk í Snælandsskóla í Kópavogi var ekið í hópbifreið að sundlaug Kópavogs í skólasund. Þegar bifreiðin beygði frá Kársnesbraut upp Urðarbraut féll barn, sem sat aftast, út úr bifreiðinni þegar neyðarhurð opnaðist skyndilega. Rannsóknarnefnd samgönguslysa gerir tvær tillögur í öryggisátt sem lesa má neðst í skýrslunni.
Síðdegis 28. ágúst 2014 var sendibifreið ekið aftan á fólksbifreið sem numið hafði staðar á Hafnarvegi. Við áreksturinn snérist sendibifreiðin á hlið og rann framan á vörubifreið sem kom úr gagnstæðri átt. Ökumaður sendibifreiðarinnar lést í slysinu. Í skýrslunni birtir Rannsóknarnefnd samgönguslysa nokkrar tillögur í öryggisátt sem lesa má aftast í skýrslunni.
Tvær bifreiðar, Volkswagen Polo og Toyota Hilux, rákust saman á Ólafsfjarðarvegi þegar ökumaður Toyota Hilux bifreiðarinnar ók yfir á rangan vegarhelming í þeim tilgangi að aka fram úr snjóruðningstæki á ferð. Nokkuð kóf var undan tönn snjómoksturstækisins í aðdraganda slyssins og aðstæður til framúraksturs voru slæmar. Í árekstrinum lést kona, farþegi í aftursæti Volkswagen Polo bifreiðarinnar. Beinir RNSA því til ökumanna að gæta vel að sér við framúrakstur svo þeir valdi ekki slysum.
Um klukkan 12:30 þann 12. janúar 2014 lentu tvær bifreiðar í hörðum árekstri á Vesturlandsvegi við Fornahvamm. Ökumaður fólksbifreiðar missti stjórn á bifreiðinni þegar henni var ekið yfir skafl sem myndast hafði við vegriðsenda við brú yfir Norðurá með þeim afleiðingum að hún snerist á veginum og hægri hlið hennar lenti framan á vöruflutningabifreið sem kom úr gagnstæðri átt. Ökumaður og farþegi fólksbifreiðarinnar létust af völdum lífhættulegra áverka sem af slysinu hlutust. Ökumaðurinn var 18 ára karlmaður og farþeginn var 16 ára stúlka.
Síðdegis þann 29. desember 2013 lentu tvær bifreiðar í harðri framanákeyrslu á Suðurlandsvegi uppi á Hellisheiði. Þeim bifreiðum var ekið á eftir öðrum bifreiðum með stuttu millibili. Ökumenn fremri bifreiðanna náðu að forða árekstri sín á milli. Ökumaður annarrar bifreiðarinnar lést af völdum áverka sinna á spítala daginn eftir. Það er niðurstaða rannsóknar á slysinu að bifreiðunum sem lentu saman í árekstrinum hafi verið ekið of nálægt bifreiðum sem á undan þeim fóru. Rannsóknarnefnd samgönguslysa bendir á mikilvægi þess að ökumenn gæti að hæfilegu bili á milli bifreiða í akstri. Í tillögu í öryggisátt er mikilvægi aðgreiningar akstursátta á Suðurlandsvegi áréttað og bent á nauðsyn þess að yfirborsmerkingar séu góðar.
Slysið varð síðla dags 14. nóvember 2013. Gangandi vegfarandi gekk frá verslunarkjarnanum við Fitjar í Reykjanesbæ, yfir Reykjanesbraut. Var hún komin yfir miðja Reykjanesbraut á leið yfir akrein fyrir umferð austur brautina þegar hún gekk í veg fyrir bifreið sem ekið var í þá átt. Vegfarandinn hlaut lífshættulega áverka og lést 16 dögum eftir slysið. Rannsóknarnefnd samgönguslysa áréttar að ökumenn dragi úr ferð og aki undir hámarkshraða í slæmu skyggni og á blautum vegi þar sem þá er mun erfiðara að sjá gangandi vegfarendur og bregðast við óvæntum atvikum. Jafnframt áréttar nefndin að gangandi vegfarendur séu ávallt með endurskinsmerki og sýni aukna varúð við vegi í slæmu skyggni.
Ökumaður fólksbifreiðar á leið austur Norðausturveg ók útaf veginum og endastakkst bifreiðin. Ökumaður kastaðist út úr bílnum en hann notaði ekki bílbelti. Hann hlaut mikla höfuð- og hálsáverka við slysið. Við rannsókn kom fram að ökumaður var verulega ölvaður og telur nefndin sennilegt að ölvunarástand hafi valdið slysinu. Of mörg dæmi eru um slys af þessum toga og brýnt að allir taki afstöðu gegn ölvunarakstri. Rannsóknarnefnd samgönguslysa telur sennilegt að ökumaður hefði lifað slys af hefði hann notað bílbelti.
Erlendur ferðamaður gætti ekki að sér þegar hann beygði til vinstri út af Vesturlandsvegi í veg fyrir bifreið sem kom úr gagnstæðri átt. Ökumaður bifreiðarinnar sem ekið var í veg fyrir lést á spítala 10 dögum síðar. Hann var ekki spenntur í öryggisbelti. Í skýrslunni eru tillögur í öryggisátt um merkingar ferðamannastaða og vegna breytinga á bifreiðum fyrir hreyfihamlaða.
Smart fólksbifreið var dregin af BMW fólksbifreið austur Suðurlandsveg. Smart bifreiðin var ekki í dráttarhæfu ástandi. Dráttartóg var milli bifreiðanna og byrjaði Smart bifreiðin að rása og sveiflast til í drætti. Fór hún yfir á öfugan veghluta og hafnaði framan á vinstra framhorni hópbifreiðar með þeim afleiðingum að 24 ára karlmaður lést í slysinu. Driföxlar Smart bifreiðarinnar voru ekki á sínum stað, en þeir gegna m.a. því hlutverki að halda hjólalegu saman á hjólnafinu. Sökum þessa var hjólabúnaður að aftan ekki fastur undir bifreiðinni og losnuðu báðir hjólbarðarnir undan rétt fyrir slysið. Rannsóknarnefnd samgönguslysa beinir því til allra þeirra sem hafa með flutning ökutækja að gera að gæta vel að ástandi ökutækjanna svo forða megi að viðlíka slys verði aftur.
Slysið varð síðdegis á Suðurlandsvegi austan við Kjartansstaði. Ökumaður Toyota Hiace sendibifreiðar ók austur Suðurlandsveg frá Selfossi. Að sögn vitna rásaði bifreiðin á veginum og stefndi yfir á öfugan vegarhelming. Ökumaður fólksbifreiðar með fellihýsi sem ók vestur Suðurlandsveg sá bifreiðina koma á móti sér og vék frá og slapp við árekstur. Fyrir aftan fólksbifreiðina með fellihýsið var Iveco vörubifreið og hafnaði Toyota sendibifreiðin framan á henni. Ökumaður Toyota sendibifreiðarinnar slasaðist lífshættulega í árekstrinum og lést vegna áverka sem hann hlaut í slysinu.
Slysið varð á Suðurlandsvegi við Meðallandsveg í Eldhrauni. Ökumaður fólksbifreiðar missti stjórn á bifreið eftir framúrakstur á miklum hraða. Ökumaður reyndi að halda bifreiðinni á veginum en hafnaði útaf vinstra megin. Valt bifreiðin í gegnum fjárgirðingu og út í hraun. Tvær stúlkur, farþegar í aftursæti köstuðust út úr bifreiðinni. Stúlkurnar voru 15 og 16 ára og létust báðar á vettvangi. Þær notuðu hvorugar bílbelti.
Slysið varð á Djúpvegi í Skötufirði sunnan við Hvítanes. Tvær konur, ökumaður og farþegi í framsæti voru á leið inn fjörðinn í suðurátt þegar ökumaðurinn missti stjórn á bifreiðinni og valt hún utan vegar. Ökumaðurinn lést en hann notaði ekki bílbelti og kastaðist út úr bifreiðinni. Vegna slyssins vill Rannsóknarnefnd samgönguslysa benda ökumönnum á mikilvægi viðbragða ef hjólbarði fer út fyrir slitlag. Ef hjól fer út fyrir slitlag er mikilvægt að ökumenn reyni að halda ró sinni og beygja rólega inn á slitlagið ef kostur er. Þá ítrekar nefndin mikilvægi þess að ökumenn noti bílbelti og miði ökuhraða við aðstæður.
Ökumaður bifhjóls ók hratt austur Faxabraut á Akranesi að degi til. Ökumaðurinn tók fram úr bifreið rétt áður en hann kom að hraðatakmarkandi koddum og samkvæmt vitnum, lenti hann utan í öðrum koddanum þegar hann reyndi að sveigja fram hjá honum rétt eftir framúraksturinn. Við það virðist hann hafa fipast við aksturinn og rétt áður en hann kom að vinstri beygju 50 metrum austar, hemlaði ökumaðurinn þannig að afturhjólbarði læstist og rann hjólið beint á gangstétt. Við það fór hjólið á hliðina og ökumaðurinn kastaðist út fyrir veg og niður í fjöru með þeim afleiðingum að hann lést.
Ökumaður jeppabifreiðar ók yfir á rangan vegarhelming í veg fyrir litla fólksbifreið með þeim afleiðinum að ökumaður fólksbifreiðarinnar lést. Harður árekstur varð á milli bifreiðanna og kastaðist fólksbifreiðin aftur um 12 til 13 metra. Ökumaður jeppabifreiðarinnar var ofurölvi. Rannsóknarnefnd samgönguslysa ítrekar fyrri ábendingar og tillögur í öryggisátt varðandi akstur undir áhrifum áfengis.
Slysið varð við heimreiðina að Skjöldólfsstöðum í Breiðdal. Ökumaður fjórhjóls ók austur Suðurbyggðaveg (nr.966) og hugðist beygja inn á heimreiðina að Skjöldólfsstöðum. Hann var með farþega á fjórhjólinu, þriggja ára stúlku, sem sat fyrir framan hann. Þegar ökumaður hugðist beygja jókst inngjöf og valt hjólið með þeim afleiðingum að stúlkan lést samstundis. Rannsóknarnefnd samgönguslysa brýnir það fyrir forráðamönnum barna að þeir gæti varúðar, sýni ábyrgð og fylgi reglum sem um ökutækin gilda.
Ökumaður dráttarvélar með áföstum ámoksturstækjum ók í veg fyrir jeppabifreið sem kom úr gagnstæðri átt við Brautarholt á Skeiðum á Suðurlandi. Ámoksturstækin gengu langt inn í jeppabifreiðina með þeim afleiðingum að mikil aflögun varð inn í fólksrými hennar. Ökumaður jeppabifreiðarinnar lést í slysinu. Að mati Rannsóknarnefndar samgönguslysa er brýnt að settar verði reglur um umferð vinnuvéla með áföstum ámoksturstækjum.
Ökumaður jeppabifreiðar, sem var á leið suður Norðurlandsveg missti stjórn á bifreið sinni og kastaðist útaf veginum til hægri. Valt bifreiðin og lést 12 ára drengur, sem var farþegi í aftursæti, í slysinu. Að mati RNSA má rekja orsök slyssins til vindhviðu og ökuhraða, Nefndin ítrekar ábendingar sínar um að ökumenn þurfi að draga úr ökuhraða í hvassviðri til að draga úr hættu á því að ökutæki þeirra fjúki. Nefndin bendir á skyldur vegfarenda til aðstoðar við umferðarslys en að sögn farþega óku nokkrir ökumenn framhjá slysstað og sinntu ekki aðstoð sem eftir var leitað.
Slysið varð á Nýbýlavegi rétt fyrir 9.00 að morgni og var skyggni slæmt, myrkur og rigning. Eldri kona gekk út á götuna í veg fyrir fólksbifreið á vesturleið og síðan í veg fyrir strætisvagn sem ekið var austur Nýbýlaveg. Konan varð fyrir hægra framhorni strætisvagns og lést vegna höfuðáverka sem hún hlaut í slysinu. Konan var dökkklædd og notaði ekki endurskinsmerki. RNU telur að gera þurfi úrbætur á Nýbýlavegi með öryggi gangandi vegfarenda að leiðarljósi. Að mati RNU er mikilvægt að auka notkun vegfarenda á endurskinsmerkjum og vekja skilning þeirra á mikilvægi endurskinsmerkja.
Fólksbifreið var ekið á karlmann sem gekk yfir Sæbraut að morgni til í myrkri og rigningu. Hann var fluttur mikið slasaður á bráðadeild Landspítala og lést vegna afleiðinga slyssins rúmum þremur vikum síðar. Ökumaður fólksbifreiðarinnar varð mannsins ekki var fyrr en rétt áður en hann lenti á bifreiðinni. Maðurinn var klæddur dökkum fatnaði sem var án endurskinsmerkja.
Slysið varð á Djúpvegi á austanverðri Steingrímsfjarðarheiði. Ökumaður fólksbifreiðar ók veginn áleiðis til Hólmavíkur. Hann ók of hratt í beygju á veginum og missti stjórn á bifreiðinni með þeim afleiðingum að hún hafnaði útaf. Fór bifreiðin í loftköstum yfir lækjarræsi og framan á klöpp. Ákeyrslan á klöppina var mjög hörð og lést ökumaðurinn samstundis. Tveir farþegar í bifreiðinni hlutu lífshættulega áverka.
Ökumaður sem ók norður Norðurlandsveg missti stjórn á bifreið sinni vestan við bæinn Vatnshlíð með þeim afleiðingum að hún fór út af veginum, niður brattan vegfláa og lenti harkalega á lækjarbakka. Ökumaðurinn, sem var einn í bílnum, lést í slysinu. Hann var ekki spenntur í öryggisbelti og undir miklum áhrifum slævandi lyfs sem sennilega skýrir orsök og afleiðingar slyssins.
Ökumaður fólksbifreiðar ók Ólafsfjarðarveg til norðurs áleiðis til Dalvíkur rétt fyrir miðnætti. Samkvæmt vitnum var bifreiðinni ekið á miklum hraða norður veginn og er sennilegast að ökumaður hafi misst stjórn á henni í hægri beygju. Valt bifreiðin utan vegar. Ökumaður notaði ekki bílbelti og kastaðist út úr bifreiðinni. Áréttar rannsóknarnefndin fyrri ábendingar um mikilvægi bílbelta og hættur af ofsakstri.
Ökumaður ók fólksbifreið yfir blindhæð á malarvegi. Efst á blindhæðinni voru stórar holur í veginum og missti ökumaðurinn stjórn á bifreiðinni, sem rann út af veginum og valt. Ökumaðurinn lést af völdum áverka sem hann hlaut í slysinu og farþegi sem sat í framsæti slasaðist. Ökumaðurinn átti við veikindi að stríða og var undir áhrifum slævandi lyfja þegar slysið átti sér stað og var af þeim sökum í óökuhæfu ástandi.
Erlendur ferðamaður ók bílaleigubíl frá Vík í Mýrdal austur Suðurlandsveg. Tveir farþegar voru í bifreiðinni. Rúmum 40 kílómetrum austur af Vík missti ökumaðurinn bifreiðina út á vegöxlina þegar hann teygði sig eftir snakki frá farþega í framsæti. Við það missti hann stjórn á bifreiðinni sem fór útaf veginum og valt. Farþegi sem sat í aftursæti bifreiðarinnar var ekki spenntur í öryggisbelti. Kastaðist hann út úr bifreiðinni og
lést samstundis.
Sendibifreið var ekið suður Ólafsfjarðarveg áleiðis til Akureyrar. Veður var mjög hvasst, suðvestan stormur og Skammt frá bænum Krossar fékk bifreiðin á sig vindhviðu sem feykti henni til á veginum og við það missti ökumaður stjórn á henni. Hafnaði bifreiðin framan á vörubifreið sem ekið var úr gagnstæðri átt. Ökumaður sendibifreiðarinnar dó í slysinu. Það er mat RNU að auka þurfi þurfi fræðslu í ökunámi og í áróðri til almennings um áhrif færðar, vinds og vindhviða á stöðugleika ökutækja. Þá þarf að kynna betur þær rauntímaupplýsingar sem til eru á Vegasjá Vegagerðarinnar um færð og veður á helstu leiðum.
Ökumaður fólksbifreiðar ók suðurvestur þjóðveg 1 á Hrútafjarðarhálsi. Hann missti stjórn á bifreiðinni í beygju vegna hraðaksturs. Bifreiðin valt á veginum og hafnaði út af vinstra megin miðað við akstursstefnu. Ökumaður notaði ekki bílbelti og var í óökuhæfu ástandi sökum neyslu vímuefna. Kastaðist hann út úr bifreiðinni sem valt síðan yfir hann.
Slysið varð að kvöldlagi á Siglufirði. Atvik voru þau að hópbifreið, með ungmennum, var ekið til Siglufjarðar eftir heimsókn til Ólafsfjarðar. Ökumaður hópbifreiðarinnar hafði stöðvað bifreiðina til að hleypa nokkrum ungmennum út. Þrjár 13 ára stúlkur voru meðal þeirra og fóru þær aftur fyrir hópbifreiðina og yfir götuna. Fólksbifreið sem ekið var á nokkurri ferð suður Langeyrarveg ók á stúlkurnar. Við ákeyrsluna lést ein stúlknanna vegna fjöláverka sem hún hlaut. Önnur stúlka slasaðist alvarlega í ákeyrslunni en sú þriðja minna.
Ökumaður vörubifreiðar með festivagn ók norður Innstrandaveg á Stikuhálsi þegar sauðfé hljóp í veg fyrir bifreið hans. Ökumaðurinn snögghemlaði með þeim afleiðingum að þungur farmur festivangs bifreiðarinnar fór af stað, braut niður framgafl vagnsins, lenti svo á stýrishúsi bifreiðarinnar og braut það af festingum sínum. Að mati RNU skapaðist alvarleg hætta þar sem farmurinn var ekki festur eins og reglur kveða á um.
Ökumaður fólksbifreiðar missti stjórn á henni í mikilli hálku á leið upp Fagradal. Bifreiðin fór yfir á rangan vegarhelming og lenti framan á vörubifreið sem kom úr gagnstæðri átt. Ökumaður fólksbifreiðarinnar lést af völdum slyssins. Um einum kílómetra frá slysstað var vegurinn hálkulaus. Þaðan hafði hálkan farið vaxandi þar til að um 500 metrum frá slysstað var orðin flughálka sem var illgreinanleg. Undir fólksbifreiðinni voru slitnir sumarhjólbarðar.
Slysið varð á Geirsgötu við gatnamót Tryggvagötu og Mýrargötu. Aðdragandi slyssins var sá að ökumenn tveggja BMW bifreiða óku Geirsgötu, í kappakstri, til vesturs. Missti annar ökumanna stjórn á bifreið sinni vegna reynsluleysis og of mikils hraða og hafnaði hún á grjóti og húsvegg. Farþegi í aftursæti bifreiðarinnar lést í slysinu.
Slys þetta varð á heimreiðinni að bænum Mið-Seli í Rangárvallasýslu seinni part dags í ágúst. Ökumaður fólksbifreiðar ók að heimreiðinni en stöðvaði við hlið sem þar er. Í bifreiðinni voru þrjú börn ásamt ökumanni og hugðust tvö þeirra hlaupa eftir heimreiðinni að húsi sem þau dvöldu í. Annað barnið, ung telpa, var við hlið bílsins þegar ökumaður ók af stað og varð undir honum. Að mati RNU gætti ökumaður ekki að því að telpan var í mikilli hættu vegna nálægðar sinnar við bifreiðina.
Ökumaður ók bifhjóli út af heimreið ofan í læk við bæinn Víkur að kvöldi til. Hafnaði hann með höfuðið á steini á lækjarbakkanum. Hann var ekki með hlífðarhjálm á höfðinu og hlaut við fallið banvæna höfuðáverka. Rannsóknarnefnd umferðarslysa telur miklar líkur á því að hann hefði lifað slysið af, hefði hann verið með hlífðarhjálm. Beinir nefndin því til allra sem aka bifhjólum, bæði litlum bifhjólum og stórum, að vera með viðurkenndan hjálm og gæta að því að hann sé tryggilega festur á höfuðið við notkun.
Árekstur
Ökumaður fólksbifreiðar á leið austur Suðurfjarðaveg ók útaf veginum við Kambanes. Bifreiðin valt niður brattan fláa og kastaðist ökumaður út úr bifreiðinni. Hann notaði ekki bílbelti. Meginorsök slyssins má rekja til þess að ökumaður var ölvaður. Að mati rannsóknarnefndar umferðarslysa ber brýna nauðsyn til að unnið verði að sértækum forvörnum vegna ölvunaraksturs.
Ökumaður fólksbifreiðar ók inn á þjóðveg 1 í Víðidal í veg fyrir vöruflutningabifreið. Harður árekstur varð á milli bifreiðanna og lést ökumaður fólksbifreiðarinnar af hans völdum. Ökumaðurinn, sem lést, var 68 ára gamall. Rannsóknarnefnd umferðarslysa hefur rannsakað nokkur sambærileg slys þar sem eldri ökumaður virðir ekki biðskyldu og ekur í veg fyrir aðvífandi umferð. Rannsóknir RNU benda til að fækka megi banaslysum eldri ökumanna í umferðinni með því að leggja áherslu á umfjöllun um þennan flokk slysa.
Ungur ökumaður lést er hann kastaðist út úr bifreið sinni þegar hún valt utan Akureyjarvegar. Af ummerkjum á vettvangi slyssins mátti ráða að ökumaður hafi misst bifreiðina í hliðarskrið í mjúkri hægri beygju. Bifreiðin hafi runnið út af veginum og oltið nokkrar veltur utan vegar. Ökumaður bifreiðarinnar, sem var einn á ferð, var ekki spenntur í öryggisbelti og kastaðist hann út úr bifreiðinni í veltu. Hann lést samstundis af völdum áverka sem af slysinu hlutust. Orsakir slyssins má sennilega rekja til hraðaksturs og bágborins ástands hjólbarða bifreiðarinnar.
Slysið varð með þeim hætti að ökumaður strætisvagns var að aka frá biðstöð strætisvagna á Seljabraut þegar eldri karlmaður kom hlaupandi að vagninum. Hann reyndi að vekja á sér athygli með því að berja í hlið vagnsins. Vagnstjórinn varð mannsins ekki var og ók af stað eftir að hafa hleypt farþegum út. Maðurinn féll í götuna og varð fótleggur hans undir afturhjólbarða strætisvagnsins. Að mati RNU sýndi vegfarandinn, sem lést, af sér óvarkárni er hann reyndi að stöðva strætisvagninn. Varar nefndin við þeirri hættu sem af hlýst þegar vegfarendur reyna að stöðva strætisvagna sem ekið hefur verið af stað.
Ökumaður fólksbifreiðar ók austur þjóðveg 1 í Langadal á Möðrudalsöræfum. Tveir ungir menn voru í bifreiðinni. Af ummerkjum á vettvangi að dæma missti ökumaður stjórn á bifreiðinni til hægri út í malaröxl. Ökumaður reyndi að beygja bifreiðinni til vinstri upp á veginn aftur en við það valt hún og hafnaði utan vegar. Að mati RNU voru þrír meginþættir sem ollu slysinu. 1) Ökumaður var undir áhrifum áfengis, þreyttur og hefur sennilega sofnað við aksturinn. 2) Ökumaður ók of hratt í beygju 3) Ökumaður brást ekki rétt við útafakstrinum þegar hann stýrði bifreiðinni of snöggt til vinstri. Rannsóknarnefnd umferðarslysa beinir því til Ökukennarafélags Íslands að skýrsla þessi verði notuð, sem hluti af kennsluefni, til þess að varna því að aðrir ökumenn geri sambærileg mistök.
Fólksbifreið var ekið á karlmann sem skokkaði í vinstri vegkanti norður Eyjafjarðarbraut síðdegis 20. janúar 2011 móti akstursstefnu ökutækja. Fólksbifreiðinni var ekið norður brautina. Henni var ekið yfir á rangan vegarhelming. Karlmaðurinn sem ekið var á lést við áreksturinn. Orsakir slyssins voru raktar til þess að ökumaðurinn fór yfir á rangan vegarhelming, sennilega vegna þess að hann sofnaði við aksturinn.
Ökumaður DAF vörubifreiðar, með Moeslein tengivagn, ók áleiðis norður þjóðveg 1 í Langadal að kvöldlagi. Á palli bifreiðarinnar voru lyftari og steinrör auk annars farms. Á tengivagninum voru 9 raðir af steinrörum og var hleðslan um 2,5 metrar á hæð. Innarlega í Langadal fór tengivagninn að hluta yfir á öfugan vegarhelming.
Tveimur fólksbifreiðum var ekið á hægri akrein suður Snorrabraut seinni part dags. Myrkur var úti, þurrt og meðal vindur. Fyrri bifreiðin var af Volkswagen Golf gerð en sú síðari Subaru Justy. Ökumenn þeirra biðu um stund á rauðu ljósi við Laugarveg, en óku svo áfram eftir að græna ljósið kom. Er þeir nálguðust gatnamótin við Bergþórugötu jók ökumaður Subaru bifreiðarinnar nokkuð hraðann og skipti yfir á vinstri akrein til að taka fram úr.
Ökumaður fólksbifreiðar ók Borgarbraut í Borgarnesi til suðurs. Á sama tíma gekk gangandi vegfarandi, kona áleiðis yfir Borgarbrautina á gangbraut á móts við pósthúsið þar. Ökumaður sá ekki til konunnar og ók á hana. Þegar slysið varð var sól lágt á lofti úr suðri og blindaði ökumann. Konan sem fórst í slysinu var sem var 77 ára kona.
Erlendur ferðamaður ók Pajero jeppabifreið áleiðis Dyrhólaveg að vegamótum við þjóðveg 1 með tvo farþega. Á sama tíma var Dodge pallbifreið með eftirvagn ekið áleiðs austur Suðurlandsveg að vegamótunum. Í þeirri bifreið var einn farþegi auk ökumanns. Ökumaður Pajero bifreiðarinnar veitti vegamótunum ekki eftirtekt og ók inn á þau beint í veg fyrir pallbifreiðina.
Slysið varð með þeim hætti að tvö ökutæki rákust saman á vegamótum Hafnarvegar (99) og Hringvegarins. Toyota jeppabifreið, með hestakerru í eftirdragi með einum hesti í, var ekið norður Hafnarveg að vegamótunum. Ökumaður jeppans var á leið vestur áleiðis til Reykjavíkur og var einn á ferð með einn hest í kerrunni. Annarri bifreið, Kia Sportage, var ekið vestur Hringveginn að vegamótunum og beygt til vinstri inn á Hafnarveg beint í veg fyrir Toyota bifreiðina.
Gömul hópbifreið, með 15 erlenda ferðamenn innanborðs ásamt leiðsögu og ökumanni, fór út af þjóðvegi 1 í Reykjadal við bæinn Einarsstaði að kvöldi til miðvikudaginn 21. júlí 2010. Nokkrir farþeganna hlutu mikil
meiðsli og margir hlutu mar og skrámur.
Bifhjólamaður ók norður Vestfjarðaveg áleiðis að Gilsfirði. Á sama tíma var Nissan jeppabifreið ekið eftir heimreið frá sveitabæ áleiðis yfir Vestfjarðaveg. Tvær heimreiðar koma að veginum á þessum stað og mynda kross vegamót, sjá mynd hér að neðan. Ökumaður bifreiðarinnar sá ekki bifhjólið og ók inn á veginn í veg fyrir það.
Ökumaður jeppabifreiðar ók norður Hringbraut frá Reykjanesbæ. Í bifreiðinni voru að auki þrír farþegar. Höfðu þeir allir verið að skemmta sér um nóttina og voru á heimleið undir morgun, áleiðis að Garði og Sandgerði. Skammt frá Mánatorgi ók ökumaður utan í ljósastaur, sveigði síðan til vinstri og ók þar útaf. Bifreiðin valt og hafnaði fimm metra utan vegar á hjólunum.
Ökumaður fólksbifreiðar ók eftir þjóðvegi 1 á suðurleið frá Egilsstöðum. Skammt norðan við bæinn Ketilsstaði liggur vegurinn um aflíðandi vinstri beygju. Á vettvangi mátti greina að ökumaður hafði ekið út fyrir malbikið í beygjunni og sáust greinileg för í vegöxlinni hægra megin. Ökumaður hefur sennilega reynt að stýra bifreiðinni upp á veginn aftur en við það misst stjórn á henni.
Slysið varð á Hafnarfjarðarvegi við Arnarnesbrú. Ökumaður Suzuki bifreiðar sem ók suður veginn missti stjórn á ökutæki sínu og hafnaði framan á Benz leigubifreið sem ekið var norður Hafnarfjarðarveg. Þrír fórust í slysinu, báðir ökumenn bifreiðanna og farþegi í framsæti leigubifreiðarinnar. Farþegi í leigubifreiðinni og ökumaður Suzuki bifreiðarinnar notuðu bílbelti en ökumaður leigubifreiðarinnar ekki.
Um hádegisbil 27. október fannst dráttarvél á hliðinni í Fögruhlíðará. Ummerki á vettvangi sýndu, að vélinni hafði verið ekið norður heimreið að bænum Hlíðarhúsum, en lent útaf veginum til hægri.
Seinnipart dags var jeppabifreið ekið norður Vesturlandsveg í ágætu veðri. Engin úrkoma var, vegyfirborðið var þurrt og lítill vindur. Rétt sunnan við Borgarnes var vörubifreið með tengivagn ekið fram úr bifreiðinni.
Hópur erlendra ferðamanna var á ferð á fjórhjólum á Haukadalsvegi að degi til. Fjórhjólin voru tekin á leigu hjá fjórhjólaleigu. Voru ferðamennirnir alls 17 á 12 til 14 hjólum auk tveggja leiðsögumanna sem óku fremst og aftast. Ferðin hófst við starfsstöð leigunnar rétt við Geysi. Var ferðinni heitið upp að Sandvatni og til baka um Haukadalsveg. Þar sem slysið átti sér stað var ekið niður brekku og neðst í brekkunni er kröpp hægri beygja. Þar missti ökumaðurinn stjórn á hjólinu með þeim afleiðingum að hjólið fór útaf í beygjunni (sjá mynd) og bæði hann og farþeginn köstuðust af því.
Slysið varð á Hlíðarvegi í Jökulsárhlíð skammt frá bænum Sleðbrjóti. Ökumaður Suzuki Vitara fólksbifreiðar ók norður Hlíðarveg í átt að Hellisheiði eystri. Mjög hvasst var og fékk bíllinn á sig hviðu með þeim afleiðingum að afturendinn lyftist og færðist út úr hjólförunum, bifreiðin rásaði eftir það á veginum og valt síðan.
Ökumaður bifhjóls ók norðaustur Þingvallaveg að kvöldlagi í rökkri. Hann var á ferð með öðrum félögum sínum. Slysið varð skammt frá bænum Brúsastöðum en þar liggur vegurinn í mjúkri vinstri beygju. Bifhjólamaðurinn ók útaf áður en hann kom í beygjuna og hafnaði hjólið um 75 metra frá útafakstursstaðnum (sjá mynd 1). Við útafaksturinn féll bifhjólamaðurinn af hjólinu og hlaut banvæna höfuðáverka.
Vörubifreið, með flatvagn í eftirdragi, var ekið að kvöldi til um Langadal áleiðis til Akureyrar. Auk ökumanns var einn farþegi í bifreiðinni. Veður var gott, lítill vindur og bjart. Á flatvagni sem bifreiðin dró var ýmiskonar farmur, m.a. landbúnaðartæki og byggingarefni. Rétt áður en komið var að bænum Hólabæ, hvell sprakk hjólbarðinn hægra megin að framan og missti ökumaðurinn við það stjórn á bifreiðinni og fór hún útaf veginum til hægri.
Slysið varð á Djúpvegi í austanverðum Álftafirði. Ökumaður fólksbifreiðar ók veginn til norðurs en með í för voru þrír farþegar. Var bifreiðinni ekið útaf veginum vinstra megin og hafnaði hún á vinstri hlið í flæðarmálinu um 50 metra frá útafakstursstaðnum. Ummerki á vettvangi gáfu til kynna að bifreiðinni hafi verið ekið yfir rangan vegarhelming.
Lítilli sendibifreið var ekið suður Grindavíkurveg snemma morguns. Veður var gott, sól og logn. Jeppabifreið var ekið úr gagnstæðri átt. Skömmu áður en þær mættust sveigði jeppabifreiðin yfir á vegarhelming sendibifreiðarinnar og lentu þær saman í harðri framanákeyrslu.
Ökumaður fólksbifreiðar ók vestur Hringbraut. Hugðist hann aka suður Birkimel og var því á beygjuakrein. Á sama tíma var bifhjóli ekið austur Hringbraut. Virðist sem ökumaður fólksbifreiðarinnar hafi ekki séð bifhjólið og ók í veg fyrir það. Ökumaður bifhjólsins reyndi að hemla en féll af bifhjólinu. Hafnaði hann á hlið fólksbifreiðarinnar og lést vegna áverka sem hann hlaut.
Ökumaður lítillar fólksbifreiðar ók suður Suðurfjarðaveg í botni Fáskrúðsfjarðar seint að nóttu. Í bifreiðinni var einn farþegi auk ökumanns. Bifreiðinni var ekið yfir einbreiða brú yfir Dalsá. Strax eftir brúna kemur kröpp vinstri beygja. Ummerki á vettvangi bentu til þess að bifreiðin hafi farið að skríða til í beygjunni með þeim afleiðingum að hún fór útaf og valt þrjár veltur. Valt bifreiðin um 60 metra utan vegar.
Slysið varð á Akrafjallsvegi miðja vegu milli Akraness og Hvalfjarðarganga. Ökumaður fólksbifreiðar ók vestur Akrafjallsveg í átt að Akranesi en ók yfir á rangan vegarhelming og útaf veginum sunnaverðum. Bifreiðin hafnaði um 100 metra frá útafakstursstaðnum, utanvegar. Ummerki á vettvangi gáfu til kynna að bifreiðinni hafi verið ekið yfir rangan vegarhelming, vegöxl og niður vegfláann en síðan oltið nokkrar veltur þegar hún var komin niður á jafnsléttu
Slysið varð á Hverfisgötu við útkeyrslu bílastæðahússins við Traðarkot. Tildrög slyssins má rekja til þess að ökumaður fólksbifreiðar var á leið út úr bílastæðahúsinu og hugðist beygja til hægri inn á Hverfisgötu. Útkeyrslan út úr bílastæðahúsinu er þvert á gangstétt. Gangandi vegfarandi, ung kona, var á leið eftir henni til vesturs á sama tíma og ökumaður bifreiðarinnar beið færist eftir að komast inn á Hverfisgötu. Vegfarandinn gekk út á götuna fram fyrir bifreiðina en um leið ók ökumaðurinn af stað og á vegfarandann. Hægra framhjól biðreiðarinnar ók yfir vinstri fót konunnar og við það skall hún mjög harkalega aftur fyrir sig og hlaut lífshættuleg höfuðmeiðsli. Vegfarandinn, 34 ára kona, lést af áverkum sem hún hlaut í slysinu tveimur dögum síðar.
Snemma að morgni dags var bifreið ekið austur Suðurlandsveg. Veðrið var ágætt, engin ofankoma og lítill vindur en myrkur. Rétt austan við Selfoss ók bifreiðin á vegfarenda sem var að hlaupa yfir eða eftir veginum. Vegfarandinn lést af áverkum sem af hlutust. Ökumaður bifreiðarinnar varð vegfarendans ekki var fyrr en rétt fyrir áreksturinn. Þá reyndi hann að sveigja frá til vinstri m.v. akstursstefnu sína. Hann náði ekki að hindra árekstur og lenti vegfarandinn á hægra framhorni bifreiðarinnar. Hann kastaðist svo af henni út fyrir veg.
Slysið varð með þeim hætti að tvö ökutæki rákust saman á Ólafsfjarðarvegi skammt frá bænum Krossum í Eyjafjarðarsýslu. Ökumaður Suzuki bifreiðar ók suður Ólafsfjarðarveg í átt að Akureyri. Samkvæmt framburði vitna var aksturslag hans óeðlilegt. Hann ók á öfugum vegarhelmingi, rásaði milli akreina og var með kveikt á hættuljósum.
Ökumaður Subaru bifreiðar var einn í bifreið sinni á leið suður Reykjanesbraut seinnipart dags. Var bifreiðinni ekið í miðri röð nokkurra bifreiða. Skyndilega fór bifreiðin út af veginum til hægri. Hægra framhorn hennar hafnaði á ljósastaur með þeim afleiðingum að bifreiðin snerist og valt.
Ökumaður fólksbifreiðar ók norður Siglufjarðarveg að morgni til. Í Sandvík missti ökumaðurinn bifreiðina út í vegkant hægra megin. Vegurinn liggur meðfram sjónum á þessum kafla. Hann náði að halda bifreiðinni í vegkantinum eina 100 metra. För eftir bifreiðina sýndu að hjólin vinstra megin voru á vegöxlinni allan tímann en hægri hjól mörkuðu för í vegfláann.
Slysið varð við brúna yfir Botnsá innst í Mjóafirði á þjóðvegi 61 (Djúpvegur). Ökumaður og farþegi voru á leið til Reykjavíkur og óku sem leið lá eftir Djúpvegi inn Ísafjarðardjúp. Þar sem slysið varð er Djúpvegur með malarslitlagi og liggur í krappri beygju að brúnni yfir Botnsá. Miðað við hjólför á vettvangi virðist ökumaður hafa misst stjórn á bifreiðinni með þeim afleiðingum að hún rann út í malaröxlina í beygjunni hægra megin.
Ökumaður lítillar fólksbifreiðar ók suður Hafnarfjarðarveg að nóttu til. Í bifreiðinni, auk ökumanns, voru fimm farþegar. Farþegar og ökumaður voru allt ungmenni undir tvítugu. Var bifreiðinni ekið á vinstri akrein niður brekku sem endar í aflíðandi hægri beygju. Neðarlega í brekkunni missti ökumaður stjórn á bifreiðinni.
Banaslys varð snemma að morgni við árekstur bifreiða sem ekið var úr gagnstæðum áttum. Fjórum bifreiðum var ekið í lest austur Suðurlandsveg. Fremsta bifreiðin var vörubifreið með festivagn og sú næsta var sendibifreið. Toyota pallbifreið var ekið úr gagnstæðri átt vestur Suðurlandsveg. Áður en pallbifreiðin og vörubifreiðin mættust varð ökumaður vörubifreiðarinnar var við að pallbifreiðin sem á móti kom leitaði til vinstri yfir á rangann vegarhelming. Ökumaður vörubifreiðarinnar reyndi að víkja frá til hægri en þrátt fyrir það rakst pallbifreiðin á hlið festivagns vörubifreiðarinnar.
Slysið varð á vegamótum Eyrarbakkavegar og Kaldaðarnesvegar. Ökumaður fólksbifreiðar ók austur Kaldaðarnesveg og hugðist beygja til vinstri norður Eyrarbakkaveg. Hann virti ekki biðskyldu og ók í veg fyrir vörubifreið með festivagn sem ekið var suður Eyrarbakkaveg. Ökumaður vörubifreiðarinnar reyndi að beygja yfir á vinstri akrein til að hindra að árekstur yrði en náði því ekki og rákust bifreiðarnar saman á miðjum Eyrarbakkavegi.
Bifhjóli og fólksbifreið var ekið suður Kringlumýrarbraut á miklum hraða. Að sögn vitna voru ökumenn í kappakstri og sveigðu framhjá öðrum ökutækjum. Mikil hætta skapaðist af þessu ökulagi fyrir aðra vegfarendur þar sem töluverð umferð var á Kringlumýrarbraut og Listabraut umrætt sinn.
Ökumaður fólksbifreiðar ók vestur Stakkahraun og hugðist beygja inn á Reykjavíkurveg og aka til suðurs. Ökumaðurinn, 72 ára kona sinnti ekki biðskyldu og ók í veg fyrir jeppabifreið sem ekið var norður Reykjavíkurveg. Vitni sem rætt var við á vettvangi lýstu því svo að konan hefði ekið óhikað fram yfir biðskylduna í veg fyrir jeppabifreiðina. Ökumaður þeirrar bifreiðar nauðhemlaði, en gat ekki forðað árekstri. Ökumaður fólksbifreiðarinnar lést í slysinu en ökumaður jeppabifreiðarinnar hlaut minniháttar meiðsli.
BMW bifreið var ekið norður Vesturgötu á Akranesi. Í bifreiðinni var auk ökumanns einn farþegi í framsæti. Dálítill vindur var þegar slysið átti sér stað og var gatan blaut. Gatan er steypt og rúmlega 8 metra breið. Víða við götuna var bifreiðum lagt við gangstéttarbrún en einnig er stutt á milli hliðargatna inn á Vesturgötu. Ökumaður BMW bifreiðarinnar tók háskalega fram úr öðrum bíl og missti þá stjórn á bifreiðinni, lenti upp á gangstétt og þaðan inn í garð og endaði ökuferðin með hörðum árekstri á húsvegg.
Karlmaður kom akandi frá bænum Svertingsstöðum á Suzuki fólksbifreið og ók hann inn á þjóðveginn til norðurs. Hann var einn í bílnum. Í sömu mund var vörubifreið lestuð tæpum 9 tonnum af heyböggum ekið norður fram hjá afleggjaranum.
Lögreglunni í Reykjanesbæ var tilkynnt um að ekið hefði verið á gangandi vegafaranda á Vesturgötu við Birkiteig. Ökumaður sem slysinu olli sýndi af sér vítaverða hegðun og flúði af vettvangi. Ekki hefur tekist að sanna hver var ökumaður umrætt skipti en bifreiðin sem hann ók fannst daginn eftir. Vegfarandinn sem ekið var á var fjögurra ára drengur.
Slysið varð á Suðurlandsvegi við Heiðmerkurafleggjara. Ökumaður Kia fólksbifreiðar var á leið til Reykjavíkur en hafði stöðvað á vegöxl til að aðstoða ökumann bilaðrar fólksbifreiðar sem var í samfloti með honum. Ökumaður Kia bifreiðarinnar hugðist taka U-beygju en gáði ekki að sér og beygði í veg fyrir flutningabifreið sem ekið var austur Suðurlandsveg.
Ökumaður fólksbifreiðar á leið frá Akureyri ók austur þjóðveginn áleiðis til Egilsstaða. Við svonefndan Ærlæk, um 30 km frá Egilsstöðum ók ökumaður útaf norðan við veginn. Leið bifreiðinnar skáhallt niður fláa vegarins sést á mynd 1. Steypt ræsi er yfir Ærlæk og hefur verið reynt að laga yfirborð þess að fláanum. Bifreiðin fór skáhallt niður fláann, og kastaðist yfir vegræsið. Undirvagn bifreiðarinnar aflagaðist mikið við lendinguna og gekk fremra hjólastell bifreiðarinnar upp og aftur í farþegarýmið við höggið. Bifreiðin staðnæmdist austanvið vegræsið og námu afturhjól við kant ræsisins.
Opel fólksbifreið var ekið norður Holtavörðuheiði að kvöldi til. Snjór þakti veginn og gekk á með snörpum éljum, hiti var rétt undir frostmarki og myrkur. Í bifreiðinni voru auk ökumans tveir farþegar, annar farþeginn sat í framsæti en hinn í vinstra aftursæti. Ökumaðurinn var óvanur akstri við vetraraðstæður og hafði einu sinni áður á ökuferli sínum ekið á hálum vegi. Allir í bifreiðinni notuðu öryggisbelti. Á sama tíma var Ford pallbíl ekið suður yfir heiðina. Í honum var ásamt ökumanni einn farþegi í framsæti. Ökumaður Opel bifreiðarinnar missti stjórn á bíl sínum og lenti framan á Ford bifreiðinni með þeim afleiðingum að farþegi í Opel bifreiðinni fórst.
Ökumaður bifhjóls ók suðaustur Krýsuvíkurveg á miklum hraða. Skammt frá Bláfjallaafleggjara ók hann framúr tveimur malarflutningabifreiðum. Vegsýn framundan var takmörkuð vegna hæðar og beygju og fór ökumaðurinn yfir heila línu og á vegarhelming fyrir umferð úr gagnstæðri átt. Við framúraksturinn missti hann stjórn á hjólinu, náði ekki beygjunni og hafnaði útaf vinstra megin. Á veginum voru 130 metra skriðför eftir bifhjólið en það hafnaði á hraunvegg 30 metra utanvegar. Vitni greinir frá því að við framúraksturinn hafi afturendi bifhjólsins byrjað að rása og ökumaður misst stjórn á því.
Ökumaður Opel fólksbifreiðar ók norður Vestfjarðaveg seinnipart dags. Veður var bjart og vindur var lítill. Vegyfirborðið var blautt og gekk á með rigningu á köflum. Þar sem slysið átti sér stað liggur vegurinn yfir hæð og í mjúkri beygju. Vegsýn fram á veginn er takmörkuð og var Opel bifreiðinni ekið niður brekku þegar hún fór útaf veginum.
Ökumaður fólksbifreiðar ók austur Suðurlandsveg í átt að Selfossi. Á Hellisheiði höfðu vegfarendur tekið eftir einkennilegu aksturslagi hans þar sem hann hafði farið yfir á öfugan vegarhelming svo lá við slysi. Nokkru síðar, þegar ökumaður var kominn að afleggjaranum við Kirkjuferju ók hann aftur yfir á öfugan vegarhelming og hafnaði framan á vörubifreið sem ekið var vestur Suðurlandsveg (sjá mynd). Var árekstrarstaður á nyrðri akreininni, á vegarhelmingi vörubifreiðarinnar. Áreksturinn var mjög harður og fórst ökumaður fólksbifreiðarinnar samstundis.
Hópbifreið var á leið frá Kárahnjúkum að Egilsstöðum með 38 manns innanborðs. Slysið varð ofarlega í Bessastaðabrekku þar sem hópbifreiðin fór útaf. Vegurinn um Bessastaðabrekku liggur í kröppum beygjum og er 10% halli á honum. Þegar ekið er niður brekkuna er fyrst 1.7 km langur aflíðandi kafli þar sem vegurinn liggur í sveig áður en komið er að krappri hægri beygju. Þar fór bíllinn útaf.
Toyota fólksbifreið var ekið afar ógætilega út úr Hveragerði og suður Þorlákshafnarveg í björtu og þurru veðri. Að sögn vitna var hún á mikilli ferð og nokkrum sinnum nærri því að lenda í árekstri við önnur ökutæki. Rétt sunnan afleggjarans að Grímslæk missti ökumaðurinn stjórn á bifreiðinni um það leiti sem hún mætti annarri bifreið sem ekið var norður sama veg. Bifreiðin skreið til hliðar út af veginum og lenti útaf vinstra megin miðað við sína akstursstefnu. Bifreiðin valt nokkrar veltur, kastaðist yfir girðingu og endaði á toppnum.
Ökumaður ók austur Biskupstungnabraut. Við Minni-Borg mættu lögreglumenn ökumanni og gáfu honum merki um að stöðva bifreiðina til að athuga ástand hans, en hann virti það að vettugi og jók þess í stað hraðann, sem áður hafði verið innan eðlilegra marka. Lögreglan hóf þá eftirför. Sáu lögreglumenn bifreiðina tvisvar eftir að þeir hófu eftirförina, fyrst á hæð áður en beygt er inn á Laugarvatnsveg af Biskupstungnabraut, en síðan sáu þeir rykmökk í fjarska þegar þeir komu inn á Laugarvatnsveg. Voru þeir þá að svipast um eftir bifreiðinni en hættir eftirför. Við nánari eftirgrennslan kom í ljós að rykmökkurinn var eftir bifreiðina og hafði ökumaður ekið útaf. Á vettvangi mátti sjá að ökumaður hafði ekið mjög hratt í beygju skammt sunnan við bæinn Þóroddsstaði og farið útaf vinstra megin.
Ökumaður fólksbifreiðar ók austur Biskupstungnabraut og stöðvaði við innkeyrsluna að versluninni Minni-Borg. Hugðist ökumaður beygja til vinstri inn á planið sem er fyrir framan verslunina. Þremur bifhjólum var ekið vestur Biskupstungnabraut á sama tíma. Ökumaður fólksbifreiðarinnar sá ekki bifhjólamennina og ók í veg fyrir þann sem fremstur fór. Bifhjólamaðurinn náði ekki að beygja frá og hafnaði á aftanverðri hægri hlið bifreiðarinnar. Við áreksturinn féll hann af hjólinu og kastaðist yfir bifreiðina. Hann hlaut innvortis áverka sem drógu hann til dauða. Hann notaði viðurkenndan öryggisbúnað, var með hjálm og í bifhjólagalla. Ökumaður og farþegi í fólksbílnum hlutu minniháttar áverka.
Árekstur varð á Akrafjallsvegi við vegamót Innnesvegar. Ökumaður strætisvagns ók vestur Akrafjallsveg að vegamótunum og hugðist beygja til vinstri inn á Innnesveg. Á sama tíma var þremur bifhjólum ekið austur Akrafjallsveg áleiðis framhjá vegamótunum á 80-90 km/klst. hraða. Ökumaður strætisvagnsins ók í veg fyrir bifhjólamennina með þeim afleiðingum að sá sem var fremstur lenti í árekstri við vagninn og fórst við það.
Seint á aðfararnótt sunnudagsins 9. júlí fór jeppabifreið út af þjóðvegi eitt efst í Norðurárdal í Skagafirði með þeim afleiðingum að ökumaður bifreiðarinnar lést. Ökumaðurinn var karlmaður á þrítugsaldri og var hann einn í bílnum. Ekki liggur fyrir nákvæm tímasetning á slysinu, en það mun hafa gerst milli klukkan 4:30 og 6 að morgni.
Banaslys varð skammt vestan við bæinn Mæri á þjóðvegi 1 milli Hveragerðis og Selfoss.
Mercedes Benz fólksbifreið var ekið eftir þjóðvegi 1 suður Hörgárdal seint að kvöldi til. Þetta kvöld var heiðskírt og hafði snöggfryst skömmu fyrir slysið. Mikil ísing hafði myndast á vegum og var þjóðvegurinn í Hörgárdal flugháll. Rétt sunnan við bæinn Krossastaði missti ökumaðurinn stjórn á bifreiðinni 100-200 m eftir að hún kom úr vinstri beygju. Sáust skriðför á veginum eina 70 metra sem enduðu í vegbrúninni. Á þessum stað er vegurinn um 6 metra breiður með 1 metra breiðri vegöxl. Umferð um veginn er um 1200 bílar á sólahring. Hár og brattur bakki er fram af veginum og mældist fláinn um 23 metrar. Neðst í brekkunni er stórgrýti. Bifreiðin rann niður brekkuna á hjólunum og fór nokkrar veltur eftir að hún lenti á stórgrýtinu. Við það kastaðist ökumaðurinn út úr bifreiðinni og lést af áverkum sem af hlutust.
Slysið varð á Álftanesvegi skammt austan við afleggjara að Bessastöðum.
Mazda fólksbifreið var ekið norður Vesturlandsveg síðdegis á sunnudegi. Slysið átti sér stað rétt norðan Þingvallaafleggjarans. Ökumaður fólksbifreiðarinnar ók yfir á rangann vegarhelming framan á Lexus jeppling sem kom úr gagnstæðri átt. Rétt áður en bílarnir skullu saman af miklu afli reyndi ökumaður jepplingsins að sveigja til hægri. Lenti fólksbifreiðin á vinstra framhorni hans. Snérist bifreiðin hálfan hring og staðnæmdist á miðjum veginum. Lexus jepplingurinn endaði um 16 metrum utan akbrautar, sjá mynd hér að neðan. Ekki sáust ummerki um hemlun á vettvangi.
Ökumaður fólksbifreiðar ók að næturlagi áleiðis til Stykkishólms. Akstursaðstæður voru ekki góðar, ísing var á veginum og myrkur. Rétt um það leyti þegar hann ók framhjá afleggjaranum að flugvellinum missti hann stjórn á bifreiðinni í aflíðandi vinstri beygju. Rann bifreiðin yfir á rangan vegarhelming og þaðan útaf veginum með hægri hliðina á ljósastaur. Valt bifreiðin við það á hliðina og endaði á hjólunum um 10 metra frá ljósastaurnum, sjá afstöðumynd hér að neðan.
Ökumaður VW-bifreiðar ók Suðurlandsveg áleiðis til Reykjavíkur í björtu veðri eftir hádegi á laugardegi. Bleyta var á veginum og umferð mikil. Í bifreiðinni voru tveir ungir karlmenn. Hafði glannalegt aksturslag ökumanns bifreiðarinnar vakið athygli vegfarenda. Á sama tíma var bifreið af gerðinni Toyota Corolla ekið áleiðis austur sama veg. Rétt fyrir slysið ók VW-bifreiðin á eftir vörubifreið. Vegna bleytu á vegi myndaðist austur af vatni fyrir aftan vörubifreiðina. Skyndilega fór VW-bifreiðin yfir á rangan vegarhelming og í veg fyrir Toyota-bifreiðina. Ekki sáust ummerki á vettvangi af hemlaförum en báðir ökumennirnir reyndu að afstýra árekstrinum með því að sveigja til suðurs. Var vinstra framhorn VW- bifreiðarinnar komið út af veginum þegar ökutækin rákust saman. Áreksturinn var mjög harður.
Umferðarslysið varð á Reykjanesbraut við Molduhraun. Ölvaður ökumaður ók fólksbifreið á miklum hraða, frá Hafnarfirði austur Reykjanesbraut. Vegna vegavinnu við tvöföldun Reykjanesbrautar voru akreinarnar tvær í austurátt þrengdar í eina og umferð veitt yfir á vesturakreinina (ekið til Hafnarfjarðar). Lögregla hafði ítrekað gert athugasemdir við varúðarmerkingar vegna framkvæmdanna. Götulýsing var ekki virk við upphaf þrengingarinnar.
Slysið varð innanbæjar á Vopnafirði við svonefnt Laxdalstún. Samkvæmt framburði vitnis ók ökumaður á miklum hraða eftir Kolbeinsgötu og beygði niður til vinstri í átt að Sundabúð/elliheimili. Ökumaður missti stjórn á bifreiðinni í beygjunni, ók yfir á öfugan vegarhelming, utan í kantstein en þar á eftir um malbikað bílastæði við hlið bílageymslu. Ökumaður ók fram af bílastæðinu og hafnaði bifreiðin í sjónum.
Ökumaður fór frá Hálendismiðstöðinni í Hrauneyjum áleiðis að ánni Köldukvísl, að talið er um miðja nótt. Malarvegur liggur frá þjóðvegi 26 að Köldukvísl og varð slysið 500 metra frá þjóðveginum eins og sýnt er á
mynd úr kortagrunni. Þar sem slysið varð liggur vegurinn í aflíðandi brekku, yfir vegræsi en þar tekur við beygja til vinstri. Ökumaður ók útaf veginum og valt bifreiðin ofan í vegræsið. Af ummerkjum að dæma hefur bifreiðin ekki oltið strax.
Útafakstur og velta
Ökumaður jeppabifreiðar ók austur Kjósarskarðsveg. Skammt frá Þórufossi virðist hann hafa misst stjórn á bifreiðinni eftir að vindhviða skall á henni og lyfti upp að aftan. Lenti framhjól bílsins í þrígang í lausamöl vegaxla. Bifreiðin snérist á veginum, hafnaði útaf vinstra megin og valt. Ökumaður bifreiðarinnar notaði ekki bílbelti og kastaðist því út um framgluggann og lenti undir henni. Hann fórst á slysavettvangi. Farþegi í framsæti slasaðist lítillega, hann notaði bílbelti.
Karlmaður og kona gengu austur Miklubraut að nóttu til milli Kringlumýrarbrautar og Háaleitisbrautar. Voru þau á gangi hægra megin stofnbrautarinnar, ýmist á akbrautinni eða uppi á grasinu. Rétt vestan við gatnamót Miklubrautar og Háaleitisbrautar ók Kia fólksbifreið á konuna á akbrautinni. Við áreksturinn kastaðist konan upp í loftið og hafnaði á grasinu 12 metrum austan við árekstarstaðinn. Dánarorsök konunnar var höfuðáverkar.
Reiðmaður var á leið vestur reiðgötu sem liggur við hlið Suðurlandsvegar og hafði tvö önnur hross í taumi. Hugðist hann fara til Bollastaða, sem er hinum megin við Suðurlandsveg, séð frá reiðgötunni. Reið maðurinn upp á Suðurlandsveg í veg fyrir fólksbifreið sem ekið var austur Suðurlandsveg. Ökumaður reyndi að afstýra árekstrinum með því að beygja frá en missti stjórn á bílnum við það og fór útaf hægra megin. Köstuðust hrossið og maðurinn af framenda bifreiðarinnar á veginn. Reiðmaðurinn fórst við ákeyrsluna. Bíllinn hafnaði á hliðinni utan vegar (sjá skýringamynd). Áfengis- og lyfjapróf leiddi í ljós að
Slysið varð á Borgarfjarðarvegi Eystri við Fossgerði, 3.7 km norðan þéttbýlismarka Egilsstaða. Tildrög slyssins má rekja til kappaksturs ökumanna tveggja fólksbifreiða sem óku í norðurátt frá Egilsstöðum að Eiðum. Óku þeir mjög greitt og skiptust á að taka fram úr hvor öðrum. Bifreiðunum var ekið samsíða rétt fyrir slysið. Ökumaður sem fórst var þá á hægri akrein, en hinn ökumaðurinn á öfugum vegarhelmingi. Á sama tíma var fólksbifreið og gámaflutningabifreið ekið úr gagnstæðri átt. Ökumaður sem ók á vinstri akrein sveigði þá yfir á réttan vegarhelming, fram fyrir ökumann á hægri akrein, sem þá ók til vinstri framan á
gámabifreiðina. Áreksturinn var mjög harður. Ökumaður hlaut yfirþyrmandi áverka á höfði, hálshrygg, brjósthrygg, mænu og ósæð og lést samstundis. Hún notaði ekki bílbelti auk þess sem hún var undir áhrifum áfengis.
Slysið varð með þeim hætti að gangandi vegfarandi á leið suður yfir Faxabraut í Keflavík gekk í veg fyrir fólksbifreið sem ekið var vestur Faxabraut. Ökumaður bifreiðarinnar sá konuna ekki í tæka tíð, hann nauðhemlaði en það dugði ekki til og konan lenti á vinstri framenda, gluggapósti og rúðu bifreiðarinnar, hentist í loft upp og skall síðan í götuna. Hún lést samstundis.
Fólksbifreið af gerðinni Opel Corsa var ekið Vesturlandsveg áleiðis til Reykjavíkur. Rétt norðan brúarinnar yfir Köldukvísl, hlupu tvö hross yfir veginn og lenti annar hesturinn framan á bifreiðinni. Við það missti ökumaður stjórn á henni og fór yfir á rangan vegarhelming þar sem hann lenti framan á annarri fólksbifreið, af gerðinni Subaru Legacy sem ekið var úr gagnstæðri átt. Ökumaður og farþegi í aftursæti vinstra megin í Opel bifreiðinni fórust í slysinu og tveir farþegar hlutu meiðsli. Ökumaður Subaru bifreiðarinnar og farþegi í framsæti hlutu nokkur meiðsli en farþegi í aftursæti hlaut lítil meiðsli. Ökumenn og farþegar í báðum bifreiðunum notuðu bílbelti.
Slysið varð á Garðskagavegi rétt norðan Sandgerðis. Ökumaður Toyota-fólksbifreiðar ók suður Garðskagaveg í átt að Sandgerði á allt of miklum hraða. Vegna ógætilegs aksturs rásaði bifreið hans til hægri út á malarvegöxl. Brást ökumaður við með því að rykkja bifreiðinni til vinstri. Við það fór hann yfir á rangan vegarhelming framan á Citroen-sendibifreið sem ekið var norður Garðskagaveg.
Árekstur varð milli fólksbifreiðar af gerðinni Musso Sport, sem dró óskráða kerru og var ekið vestur Vesturlandsveg í átt að Borgarnesi og fólksbifreiðar af gerðinni Ford Escape, sem ekið var austur Vesturlandsveg í átt að Reykjavík. Áreksturinn varð á vegarhelmingi ökumanns Ford Escape bifreiðarinnar og var mikil ákoma á hægri framhornum og hliðum beggja bifreiða (sjá afstöðumynd). Farþegi í framsæti Ford Escape bifreiðarinnar var 16 ára gömul stúlka. Hlaut hún fjöláverka og fórst í slysinu. Ökumaður Ford bifreiðarinnar slasaðist mikið. Hinn ökumaðurinn var einn á ferð og slasaðist hann nokkuð í árekstrinum. Báðir ökumenn og farþegi notuðu bílbelti og blésu loftpúðar út í báðum bifreiðum.
Árekstur varð með fólksbifreið sem ekið var vestur Suðurlandsveg og jepplings sem ekið var austur Suðurlandsveg og fórst ökumaður fólksbifreiðarinnar í slysinu. Á vettvangi voru engin hemlaför á veginum en árekstursstaður var á vegarhelmingi jepplingsins. Er það til marks um að fólksbifreiðinni hafði verið ekið á öfugan vegarhelming framan á jeppabifreiðina. Að sögn vitnis var fólksbifreiðinni ekið þétt aftan við aðra bifreið og er sennilegt að ökumaður hafi ætlað að taka framúr þeirri bifreið.
Ökumaður þungs bifhjóls ók austur Suðurlandsveg síðdegis í björtu og þurru veðri. Nokkur hundruð metrum fyrir vestan brúna yfir Eystri Rangá ók hann bifhjólinu á afturhjólbarðanum einum um stund. Í sömu andrá var bifreið ekið í gagnstæða stefnu yfir brúna. Rétt áður en bifhjólið og bifreiðin mættust, eða rúmlega 100 metrum vestan brúarinnar lenti framhjólið á malbikinu og stefndi bifhjólið framaná bifreiðina sem á móti kom.
Slysið átti sér stað um miðjan daginn. Fólk á tveimur bílum var á ferðalagi um Vestfirði, nánar tiltekið á Drangsnesvegi í áttina til Hólmavíkur. Í austanverðri Hveravík liggur vegurinn niður við fjöru og eru minjar gamallar sundlaugar í flæðarmálinu. Hafði fólkið stöðvað bifreiðarnar þar og lagt þeim við vegbrún fjær fjörunni (sjá myndir hér að neðan). Í þann mund ók Nissan fólksbifreið inn í víkina einnig áleiðis til Hólmavíkur. Ökumaður fólksbifreiðarinnar hægði á sér er hann tók eftir bílunum sem lagt hafði verið á hægri akrein miðað við akstursstefnu hans.
Ökumaður bifhjóls ók austur hringveginn við Hof í Öræfasveit en missti stjórn á hjólinu og ók útaf hægra megin m.v. akstursstefnu. Ökumaður kastaðist af hjólinu og fórst. Þar sem slysið varð er hringvegurinn beinn, 8 metra breiður og bundinn olíumöl. Hámarkshraði er 90 km/klst. Vindasamt var þegar slysið varð, en bjart úti, vegurinn þurr og vegsýn góð.
Ökumaður fólksbifreiðar ók norður Skagafjarðarveg að vegamótum við Hringveginn sunnan við Varmahlíð. Skömmu áður en ökumaður kom að vegamótunum missti hann stjórn á bifreiðinni í vinstri beygju og ók útaf hægra megin. Samkvæmt framburði farþega gerðist þetta þegar ökumaðurinn leit af veginum og í aftursætið til farþega sem þar voru. Í stað þess að aka beint útaf í halla reyndi ökumaður að stýra bílnum upp á veg.
Ökumaður fólksbifreiðar ók suðvestur Elliðavatnsveg í átt að vegamótum við Kaldárselsveg. Ökumaður missti stjórn á bifreiðinni í s-beygju. Fór bifreiðin útaf veginum vinstra megin m.v. akstursstefnu og utan í stóran stein sem var þar við hliðarveg. Bifreiðin kastaðist síðan yfir girðingu og endaði á hliðinni á túni.
Ökumaður bifhjóls ók norðvestur Kjósarskarðsveg. Skammt frá afleggjara að bænum Valdastöðum missti ökumaður stjórn á bifhjólinu í vinstri beygju og ók útaf. Á vettvangi voru 134 metra för eftir bifhjólið utarlega í hægri vegkanti (sjá mynd) og vegöxl þar til ökumaður féll af hjólinu í graslendi 8 metra frá veginum. Fórst maðurinn vegna áverka á hálshrygg og mænu sem hann hlaut í slysinu. Áfengis- og lyfjarannsókn leiddi í ljós að ökumaður var undir áhrifum áfengis og lyfja þegar slysið varð
Ökumaður fólksbifreiðar á leið norður Hjalteyrargötu missti stjórn á bifreiðinni og hafnaði hún á húsvegg. Farþegi í framsæti fórst í árekstrinum og ökumaður slasaðist alvarlega. Hvorugur þeirra notaði bílbelti. Hægri hlið bifreiðarinnar var mjög illa farin eftir áreksturinn og gekk langt inn í farþegarýmið.
Slysið varð á Sæbraut við gatnamót Kringlumýrarbrautar. Þar er Sæbraut tvær akreinar í hvora átt auk beygjuakreina að Kringlumýrarbraut. Ökumaður ók mjög hratt austur Sæbraut á hægri akrein en missti stjórn á bifreið sinni og ók útaf. Loftpúðar í ökutækinu blésu út við slysið. Ökutækið var búið bílbeltum en ökumaður notaði ekki bílbelti. Ökumaður kastaðist út úr ökutækinu, en rannsóknarnefndin telur mögulegt að ökumaður hefði lifað slysið af hefði hann notað bílbelti.
Slysið varð á Bæjarbraut neðan við verslunarmiðstöðina Garðatorg. Ökumaður fólksbifreiðar ók s-vestur Bæjarbrautina en ung stúlka gekk þar yfir á gangbraut. Svo virðist sem hvorugt hafi séð til hins og ók ökumaður fólksbifreiðarinnar á stúlkuna sem hlaut alvarleg meiðsli og lést nokkrum dögum síðar á sjúkrahúsi.
Ökumaður ók Hnífsdalsveg í átt að Ísafirði en missti stjórn á bifreið í beygju og ók útaf. Á veginum voru 34 metra skriðför eftir bifreiðina sem lágu frá hægri til vinstri miðað við akstursstefnu. Er ljóst að ökumaður missti skyndilega stjórn á bifreiðinni og en hún hafnaði í flæðarmáli neðan við veginn og var á hvolfi í sjónum þegar að var komið.
Ökumaður strætisvagns ók norður Sæbraut á hægri akrein að morgni til, en Sæbrautin er tvær akreinar í báðar áttir. Snjóað hafði um nóttina og krapi á götunni, en búið var að moka og salta. Að sögn vitna gekk umferðin hægt sökum slæmrar færðar, á um 20 til 40 km/klst hraða. Hámarkshraði á Sæbraut er 60 km/klst. Rétt sunnan gatnamótanna við Kleppsmýrarveg var strætisvagninum ekið utan í hægri hlið vörubifreiðar á vinstri akrein. Við þann árekstur sveigði strætisvagninn til hægri og fór vagninn upp á gangstétt hægra megin og þaðan aftan á aðra vörubifreið, sem var á hægri akrein. Við það hentist sú vörubifreið á jeppabifreið sem var á vinstri akrein.
Vörubifreið var ekið norður Kringlumýrarbraut, gegn rauðu ljósi á gatnamótum Kringlumýrarbrautar og Suðurlandsbrautar. Var vörubifreiðinni ekið í veg fyrir strætisvagn sem tekið hafði af stað úr kyrrstöðu á gatnamótunum vestur Laugarveg.