mi sitelen kepeken toki pona ala tan seme?

Tags:tokipona

toki pona li pona mute tawa mi. mi kama sona e ni lon tenpo pini lili taso mi pilin pona mute mute tan ni. mi wile sitelen mute kepeken toki pona lon lipu ni taso mi sitelen ala. mi sitelen mute kepeken toki Inli. ni li tan seme?

tenpo mute la ni li tan ni: mi sitelen e ijo la, jan ante li lukin e ijo ante. ni li lon toki ante kin taso toki pona la ni li lon mute. ni li pona lon sitelen musi. sitelen musi la mi ken sitelen e ni: "mi moku". ni li ken kon tu: "mi moku e ijo" anu "ijo ante ken moku e mi". ni li musi mute.

taso mi wile sitelen e lipu sona. lipu sona la mi wile e ni: jan ante li lukin e ijo sama tawa wile mi. ona li lukin e ijo sama ala la ona li kama sona e ike!

mi wile sitelen e ni kin: lipu pi pilin mi. ni li nasa mute tan ni: ona li lukin e ijo ante tawa wile mi la, ona li ken pilin e ni: "pilin sina li ike! sina wile e ike tawa jan ante!" ni li ike mute.

taso, mi wile mute sitelen mute kepeken toki pona. tenpo kama la mi wile sitelen kepeken toki pona. taso sitelen ni li pali mute. sitelen kepeken toki Inli li pali lili.